João 8

1

2

3

4

5

6

7

8

9

10

11

12

13

14

15

16

17

18

19

20

21

¹Mame ypy pona toytose Jezu, Oriwerahpã pona.

²Sã, yrokokoro toytose ropa ynororo Ritonõpo maro oturutoh taka. Imoihmãkõ tõximõse ahtao Jezu typorohse, toto amorepatohme.

³Morarame nohpo tonehse parixeu tomo a. Moeze omihpyry poko imehnõ amorepananomo a roropa takorehmase toto. Imepỹ orutua maro osenao ahtao tonese exiryke tonehse toto a Jezu ẽpataka.

⁴—Mose imepỹ orutua poko kynako. Tonese yna a osenao toto ahtao.

⁵Morara ahtao, “Nohpo etapatoko topu ke, aorihtohme,” me tymerose Moeze a kynenerykõme. Yrome otara ãko mahno? tykase toto Jezu a.

⁶Morara tykase toto Jezu tahkapotohme repe, Jezu hxirotohme. Yrome toto onezuhpyra Jezu kynexine aporo. Nono rokẽ tymerose aporo tomary ke.

⁷Mokaro otururuhtao ro towõse ropa Jezu. Ynara tykase ynororo eya xine, —Epona topu ematoko tyyrypyhpyke pyra ipunaka awahtao xine, tykase Jezu eya xine.

⁸Mame toepuise ropa Jezu nono pokona imerotohme ropa.

⁹Morara kary etaryke tyya xine toesyryhmase ropa toto atatakomino emero porehme. Tamuxime exiketõ osemazuhme toesyryhmase toto. Jezu rokẽ moroto, tynomose eya xine, nohpo maro xikihme.

¹⁰Towõse ropa Jezu. Ynara tykase ynororo nohpo a, —Ohxironanõ pyra nexi? tykase Jezu nohpo a.

¹¹—Arypyra, tykase nohpo. —Morara ahtao ohxiropyra roropa ase. Ytoko ropa. Oorypyry poko pyra ropa ke exiko, tykase Jezu eya.

¹²Morarame ynara tykase Jezu imoihmãkomo a, —Emero ezurume ase. Ymaro ytoketõ mã saeremae ytõko toto. Zae rokẽ toh exĩko isene roropa toh mana. Xinukutumã htaka ytopyra toh mana, tyyrypyrykõ poko pyra toexirykõke, tykase eya xine Jezu.

¹³Ynara tykase parixeu tomo eya, —Ãmoreme mase morara ãko opoko. Yna onutuarõtanohpopyra õmiry mana, tykase toto.

¹⁴—Arypyra, tykase Jezu. —Ypoko jotururuhtao zaero jomiry, joehtopõpyry waro jexiryke, jytory ropa waro roropa jexiryke. Yrome joehtopõpyry waro pyra matose. Jytory ropa waro pyra roropa matose.

¹⁵Kurã enẽko matose popyrahme samo, popỹ enẽko matose kure samo ahnome rokẽ oexirykõke. Morara exiryke ywy ahno tõ pũ enery poko rokẽ toto anapiakara ase.

¹⁶Yrome imehnõ apiakaryhtao ya, zae rokẽ toto apiakary ya mana, jamoreme rokẽ pyra jexiryke, Papa jenehpohpõ ymaro exiryke.

¹⁷Ynara tymerose Moeze omihpyryme, “Asakoro tuarõtanoh tõ ahtao, atae aomirykõ ahtao, zae mã toto.”

¹⁸Ypoko otuarõtanohtorỹko ase. Papa jenehpohpõ roropa ypoko otuarõtanohtorỹko mana. Atae yna exiryke Papa maro zae rokẽ ynanase, tykase Jezu toto a.

¹⁹—Otoko omy nae? tykase toto tõturupose eya. —Juaro pyra matose. Papa waro pyra roropa matose. Juaro awahtao xine, Papa roropa waro oexirykõ mana, tykase Jezu eya xine, tozuhse toto eya.

²⁰Morara tykase Jezu toto amoreparyhtao Ritonõpo maro oturutoh tao, tineru ẽ esao, ahno nekarohpyry esao. Yrome Jezu anapoipyra tokurehse toto, apoitoh po pyra ro exiryke.

²¹Morarame ynara tykase ropa Jezu eya xine, —Ytõko ropa ase. Mame jupĩko matose. Yrome oorypyrykõ maro orihnõko matose. Ymaro ytosaromepyra matose, tykase eya xine.

²²Morara exiryke tõturuse toto oseya rokene, —Ynara nykahro, “Ymaro ytosaromepyra matose.” Otarah koh exĩko nae? Oseatãkãko hnah? tykase toto.

²³Ynara tykase Jezu, —Sero nonopõkõme matose, yrome ywy tarõkara ase. Tarõkõme amarokomo, nonopõkomo. Yrome ywy tarõkara ase, kapuaono.

²⁴Morara exiryke morara yka oya xine, “Oorypyrykõ maro orihnõko matose,” ykano oya xine. Orihnõko matose oorypyrykõ maro jenetupuhpyra awahtao xine. Ywy ase Ritonõpo nymenekahpyry okurãkanekõme, tykase Jezu eya xine.

²⁵—Onoky keh ma roropa? tykase toto Jezu a. —Ywy roro ase. Apitorymero aosekarohpyry oya xine, tykase Jezu eya xine.

²⁶—Tuhke naero ase otuarõtanohtohkomo. Tuhke roropa ohxirorykõ se jahtao kyhxirotory, tuhke oorypyrykõ exiryke. Yrome ohxiropyra xine ase. Jenehpohpõ omiry ekarõko rokẽ ase oya xine. Zae ynororo, tykase Jezu eya xine.

²⁷Ritonõpo poko tõturuse Jezu, yrome onenetupuhpyra toto.

²⁸Morara exiryke ynara tykase Jezu eya xine, —Kapu ae Ayhtohpyry tanỹse oya xine ahtao wewe pokona jenetupuhnõko matose. Ywy ase Ritonõpo nenehpohpyry okurãkanekõme. Morara jahtao jamoreme pyra jerohtopõpyry exiry waro exĩko matose. Papa nekarohpyry rokẽ ekaroase oya xine. Moro waro exĩko matose, ynekarohpyry waro.

²⁹Jenehpohpõ ymaro mana. Urumekara mana tõmipona ipunaka jexiryke, tykase Jezu eya xine.

³⁰Morara kary etaryke tyya xine Jezu tonetupuhse eya xine tuhkãkomo a.

³¹Morarame ynara tykase Jezu tonetuputyhpõkomo a, juteu tomo a, —Jomipona awahtao xine ypoetoryme nymyry matose.

³²Zae ehtoh waro exĩko matose. Mame zae ehtoh waro awahtao xine õsanumanekõ poetoryme pyra exĩko matose. Yrome zae ehtoh waro pyra awahtao xine õsanumanekõ poetoryme ro matose. Onurumekasaromepyra matose, tykase Jezu eya xine.

³³—Yrome Aparão pakõme ynanase. Osanumatõkõ poetoryme exipitopyra ynanase, tykase toto. —Oty kary moro, “Õsanumanekõ poetoryme pyra exĩko matose,” ãko? tykase toto Jezu a, tõturupose.

³⁴Ynara tykase Jezu eya xine, —Oorypyrykõ poko awahtao xine tosẽke matose, oorypyrykõke rokene. Oorypyrykõ namotome sã matose toehse. Oorypyrykõ onurumekasaromepyra roropa matose.

³⁵Toipe namoto. Axĩtao rokẽ tytapyikẽ poenõ maro mana, jũme pyra. Tapyi esẽ poenõ sã pyra mana. Mãpyra tapyi esẽ mũkurume ahtao jũme tumykõ maro mana.

³⁶Ritonõpo mũkuru maro toehse awahtao xine, õsanumanekõ poetoryme pyra oripotorỹko ropa mana. Ajamihtanohtorỹko roropa mana oorypyrykõ poko pyra oehtohkõme.

³⁷Aparão pakõme oexirykõ waro ase. Yrome jetapary se ro matose ãmoreparykõ se pyra oexirykõke ya.

³⁸Papa a jamorepatopõpyry ekarõko ase repe oya xine. Yrome atamurukõ omipona rokẽ matose. Joroko tamuru omipona rokẽ matose, tykase Jezu eya xine.

³⁹—Aparão yna tamurume mana, tykase toto. —Aparão paryme awahtao xine mypoenohtory. Isaaro mehtory.

⁴⁰Zae ase Ritonõpo omiry ekarõko oya xine. Yrome aomiry se pyra matose. Jetapary se rokẽ matose. Aparão morara pyra ehse. Zae Ritonõpo omipona ynororo ehse, asã xine pyra.

⁴¹Yrome omykõ poenohnõko matose, joroko tamuru poenohnõko, tykase Jezu eya xine. —Arypyra, anoryme pyra ynanase. Yna zũ mũkurume rokẽ ynanase, Ritonõpo mũkurume, tykase toto eya.

⁴²Ynara tykase Jezu eya xine, —Ritonõpo poenõme nymyry awahtao xine ypyno mehtory, Ritonõpo wino tooehse jexiryke. Jamoreme pyra oepyase tarona aomipona jexiryke.

⁴³Jotururu onenetupuhpyra matose etary se pyra oexirykõke.

⁴⁴Omykõ mũkurume matose, joroko tamuru mũkurume. Omykõ sã matose. Pake ro oatãkatonõpo mokyro omykomo. Zae pyra ynororo ipunaka, ajohpe rokẽ exiryke. Ajohpe ynororo ahtao, toipe, ajohpãme exiryke.

⁴⁵Zae rokẽ ase. Morara exiryke jenetupuhpyra matose.

⁴⁶Jyhxirosaromepyra matose tyyrypyhpyke pyra jexiryke. Zae rokẽ ourutorỹko ase repe. Yrome zae pyra otarãme jekarõko matose jenetupuhpyra oexirykõke.

⁴⁷Ritonõpo poenõme awahtao xine aomiry metatory. Yrome aomiry onetara matose ipoenõme pyra oexirykõke, tykase Jezu eya xine.

⁴⁸Ynara tykase toto Jezu a, —Ajohpe pyra ynanase opoko, “Samariapõ mase, azahkuru exikety. Joroko omi poe rokẽ urutõme mase,” karyhtao yna a ajohpe pyra ynanase, tykase toto Jezu a.

⁴⁹—Jorokohpe pyra ase, tykase Jezu. —Papa eanohmãko rokẽ ase. Yrome matose jeunohnõko.

⁵⁰Kueahnohmatoko, kara ase oya xine repe. Yrome mokyro imepỹ jeahnohmapone. Mokyro zae jexiry enetupuhnõko mana.

⁵¹Zae rokẽ ase ynara karyhtao, “Jomipona awahtao xine orihpyra exĩko matose jũme,” karyhtao ya, tykase Jezu eya xine.

⁵²Ynara tykase juteu tõ eya, —Seromaroro jorokohpe oexiry waro ynanase. Aparão toorihse. Urutõkõ toorihse. Yrome mase ynara ãko, “Jomipona awahtao xine orihpyra exĩko matose jũme,” ãko mase.

⁵³Kytamurukõ Aparão toorihse. Aparão motyehxo reh mahse? Urutõkõ roropa toorihse. Onokyh koh mano? tykase toto tõturupose eya.

⁵⁴Ynara tykase Jezu, —Jamoreme rokẽ ase ime jehtoh onekaropyra. Yrome Papa kapuaõ rokẽ mã ime jehtoh ekarõko ya. “Kyrihpõkõ mokyro,” ãko matose repe.

⁵⁵Yrome mokyro waro pyra matose, onenetupuhpitopyra oexirykõke. Yrome zuaro ase. “Ritonõpo waro pyra ase,” karyhtao ya, ajohpe rokẽ jexiry mana, asã xine. Yrome ywy zuaro. Aomipona roropa ase.

⁵⁶Atamurukõ tãkye toehse jeneryke. Tonese tyya jexiryke tãtãkyemase toto, tykase Jezu.

⁵⁷—Yrome mase 50 anome pyra ro mase. Aparão menene? tykase toto tõturupose eya.

⁵⁸Ynara tykase Jezu eya xine, —Aparão enurupyra ro ahtao, nae ro exine, tykase Jezu eya xine.

⁵⁹Morarame Jezu omiry etaryke tyya xine topu tanỹse juteu tomo a Jezu etapatohme. Ajohpe Jezu tokarose eya xine. Morara exiryke topu tanỹse eya xine. Yrome kynotonẽne rokẽ ynororo, imoihmãkõ rãnaka. Mame Ritonõpo maro oturutoh tae kunutũtane ropa Jezu.