Ioanes 17

1

2

3

4

5

6

7

8

9

10

11

12

13

14

15

16

17

18

19

20

21

¹E Isu i taki lobo a ngava nga, lakea i mata rike na hunu, i vasileki maea, “Tata, a parava i valai pali. O kavurike iau, e Tumu, lakea iau ga kavurike ioe,

²a vuhuna o habia pali nau a nitora ga matakari e huriki lobo, ga habi a nimahuri vakaroro ne huriki o habi nau pali.

³A nimahuri vakaroro i maea: ri gi lohoka vomu, ioe kikeri a Vure muholi. Ri gi lohoka tabu nau, iau e Isu Kristo, o rudu iau a valai.

⁴Iau a rata lobo a leho o habi nau ga rata, lakea e huriki a bakovi a ngatavine ri matakilala ioe, ioe o dagi hateka.

⁵O Tata, ngane o vakabagetu tabu iau na matamu na bagetuanga ne tarua tu tahoka muga na malala ni ratarike.

⁶“E huriki a murimuri, muga o bole tala ria ne huriki a bakovi na malala, o habi ria nau. A vakasiri ioe pali ne ria. Re huriki nga a viri vomu; o habi ria nau, lakea ri longototo a ngavamu.

⁷Ngane ri lohoka vona, a maki lobo o habi nau i valai muholi vomu,

⁸a vuhuna a ngava lobo o habi nau, a habi ne ria pali, lakea ri longo mai. Ngane ri lohoka muholi ne vomu o rudu iau a valai.

⁹I uka ma a vasileki ne huriki na malala. A vasileki ne huriki a bakovi vomu ra o habi nau, a vuhuna ria e huriki a bakovi vomu.

¹⁰E huriki a viri nau, a viri vomu. E huriki a viri vomu, a viri nau. Ri vakasiri e huriki na ragu i dagi.

¹¹Iau i uka ma ga made tabaka koea na malala. Iau ga lakene, ga made turamu. Pali ria bara ri tabana ni made na malala. O Tata, ioe o Kiripiripi, o matakari ria na nitora na ramu, ra ramu o habia nau. Lakea ri gi pesi taku, i manga tarua tu ala taku kunana.

¹²Na tahuna a made turane ria, a matakari ria na nitora na ramu. I uka tara viri ge velu. A viri i ala taku kunana i velu, ra viri bara i bole a vuranga, lakea ra ngava ni here puru hosi na Hinere ge bele muholi.

¹³“Iau a popote ga sike lakene vomu. A taki a maka ngava nga na tahuna a tabana ni made koea na malala, a vuhuna a ngaru ria ri gi vivi hateka na nipitei nau.

¹⁴A habi ne ria a ngava vomu, lakea e huriki a bakovi a ngatavine na malala ri marikoi ne ria, a vuhuna i uka ma ria a viri na malala, i manga iau tara i uka ma iau a viri na malala.

¹⁵I uka ma a taki ioe go bole tala ria na malala. A ngaru go matakari ria na bakovi hale.

¹⁶Ria i uka ma ria a bakovi na malala, i manga iau tara i uka ma iau a bakovi na malala.

¹⁷O ru herehere ria na ngava muholi. A ngavamu i muholi.

¹⁸Ngane a rudu ria ri gi lakea na tanga lobo na malala, i manga a hini muga o rudu iau a puru valai.

¹⁹Iau a luhoi ria, lakea a habi a hategu ne vomu, lakea ria ranga ri gi habi a hatene ria ne vomu.

²⁰“Iau i uka ma a vasileki ne ria kunana. A vasileki tabu ne huriki ri gi luhoi tora iau na tahuna e huriki a muri­muri nau ri vakalongo ria ne nau.

²¹Lakea a ngaru ria lobo ri gi pesi taku. O Tata, a ngaru ri gi rihi tarua i manga tu varihi. Na tahuna ri made turane tarua, e huriki na malala ri gi matakilala ioe kunana o rudu iau a valai.

²²A habia a nibagetu ne ria, ra o habia nau, ri gi pesi taku i manga tarua tu ala taku kunana.

²³A ngaru iau ga made turane ria, ioe go made turagu. A ngaru ri gi pesi taku muholi, lakea e huriki a bakovi a ngatavine na malala ri gi matakilala ioe, o rudu iau a valai, ri gi matakilaka vona ioe o ngaru hateka e huriki a muri­muri nau i manga ioe o ngaru iau.

²⁴“Tata, a ngaru e huriki ra o habi nau ri gi made turagu na tanga ga made vona, ri gi masia a nibagetu nau, ra bagetuanga o habia nau, a vuhuna o ngaru iau muga na malala ni ratarike.

²⁵“Tata, ioe o malamala, e huriki a bakovi a ngatavine na malala i uka ma ri lohoka vomu, pali iau a lohoka vomu. E huriki a tara nau ri lohoka vona ioe o rudu iau a valai.

²⁶A vakasiri ria ne vomu, ioe a bakovi navai. Muri bara vakasiri tabu ioe ne ria, lakea ioe bara o ngaru ria i manga a hini o ngaru iau, lakea iau bara made turane ria.”