Ioane 17

1

2

3

4

5

6

7

8

9

10

11

12

13

14

15

16

17

18

19

20

21

¹Teina riba ta Iesu i ribaedi, abo matana i helabaisinidi galewa eai, i ene, “Tamagu e, huiana i lageo; Natum u hedebasaei arinai hinage Natum abo i hedebasaem.

²Doha ia u hetoro ma gigiborina tatao gamagaridi potadi eai, isi gamagaridi hinage u mosedi ia arinai mauri nige nosina abo i mosei aridi eai.

³Mauri nige nosina ia ede teina, bena oa se nuatuim, Eaubada tahunuana, esegana mo, eo Iesu Keriso, ia u hetamariama wa.

⁴Eau tanoubu eai ea hedebasaem: paisoa oa u leama wa, ea abiheohiyao.

⁵Tamagu e, oa abo u hedebasaegu, doha nabada wa egu hedebasae maidam ea abi wa, huiana tanoubu sora.

⁶“Oa esam ea ribahemasarahao tatao tanoubu eai u ledima wa aridi eai: isi enamyao: oa u ledima arigu eai; isi hinage em riba se sogohidio.

⁷Isi se nuatuiyao ginauri gamagaridi u ledima arigu eai oa mo arim eai se tubuma.

⁸Riba wa oa u ledima arigu eai wa, ea mosedio; isi hinage se abidio, eo se nuatulobaiyao, si ene, oa arim eai ea laomao, eo se nuatuiyao oa u hetamarigumao.

⁹Enadi ea lau‐uura wa: tanoubu enana nige ea lau‐uura, isi mo u ledima wa; paana ede isi enamyao.

¹⁰Enagu gamagaridi hinage oa enamyao ede; eo enamyao hinage enagu; hinage isi debadi eai se hedebasaegu ta.

¹¹Eau abo ea mia lautom tanoubu eai ta, isi mo abo se mia tanoubu eai ta, eo eau abo ea laowa arim eai. Tamana Tabuna e, isi u ledimao oa mo esam debana eai u sogohidi, isi abo nuadi esega mo, doha hinage ita.

¹²Tanoubu eai sora ma miagu isi maedi, isi ea sogohidi oa esam debana eai: isi u ledimao arigu eai ea sogohidio, nige esau i tauyamui, na gehena natuna iabom mo; arinai ede uriuri tabuna wa se hemamohoiei.

¹³Eau ea laowa arim eai; teina riba ta tanoubu eai ea ribaedi ta, arinai egu nualolo isi nuaboeadi eai abo se hemamohoiei.

¹⁴Em riba ea moseyao isi aridi eai: eo tanoubu se hewaiunuedi, paana ede isi nige tanoubu enadi, doha hinage eau nige tanoubu enana.

¹⁵Nige ea uura, ea ’ne oa bena tanoubu eai u abihaidi, na ea ’ne, bena tanoubu baaeana eai abo u guduguduidi.

¹⁶Isi tanoubu enana nige’e, doha hinage eau tanoubu enana nige’e.

¹⁷Em riba mamohoina arinai u hetabuedi: em riba riba‐mamohoina ede.

¹⁸Doha u hetamariguma tanoubu eai ta, eau hinage tanoubu eai ea hetamaridi.

¹⁹Isi debadi eai ea hetabuuioigu, ribamamohoina arinai isi hinage bena se hetabuedi.

²⁰“Hinage nige ea lau‐uura isibom mo enadi, na isi wa hinage edi riba arinai abo se sunusunumaegu, enadi ea lau‐uura.

²¹Isi gamagaridi bena nuadi esega; doha oa Tamagu boeagu eai, eo eau hinage boeam eai, isi hinage abo nuadi esega boeada eai: tanoubu abo se nuatui oa u hetamarigumao.

²²Hedebasaena oa u leama arigu eai wa, ea mosei isi aridi eai; isi abo nuadi esega, doha hinage ita nuada esega.

²³Eau isi boeadi eai, eo oa boeagu eai, nua‐esega mo arinai isi abo se loloesegai: arinai abo tanoubu se nuatui oa u hetamarigumao, eo u gadosisiedi, doha hinage u gadosisiegu.

²⁴Tamagu e, ea henua isi u ledima wa, egu aba mia eai abo se mia arigu eai: egu hedebasae u leama wa abo se ita; paana ede tanoubu paana sora nige se hetubu oa u gadosisieguo.

²⁵Tamagu laulau duduraina e, tanoubu nige se nuatuim: na eau ea nuatuim mo, isi hinage se nuatuiyao oa u hetamarigumao.

²⁶Esam hinage ea hemasarahayao isi aridi eai, hinage abo ea hemasaraha; abo em gadosisi arinai u gadosisiegu wa bena isi boeadi eai i ota, eau hinage boeadi eai.”