Jop 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Da e tǫde bidibo sogo, da e tiwai dao, bidigo da kegelama, wąbi hwįbo bidi nigibo. Da te sę ebo bidi dabe tiwai gilama, bomai sę naga tigidali sogo yaibao.

²Da e tiwai olo sę bidigo te giliga ibaba dega sabode agai tigi dwanu kedau emai ebo. Tama da te sę bidigo aga mone sabo tonalubo tiwai dao.

³Godigo bodolu te polua hauwa mu mani, ena dwai tiwai bidimainu. Tama tigidali hulide ena homu dwai idubao.

⁴Ena pibo saide pila muyu, eno homugo te be polo posao homu ebao. Tiali goli, huli sesabi bobobage mu yaibaso, ena pibo saide ugwa begeliyu, eda begeliyu idubadi, be posalio.

⁵Eno tigi tigide elalubo kenide te sawi pulai elalubo. Bomai tigi waligo te keni halubo dao, tama te keni dabe olo tigi wali pepeda pelama, tigidali tigide tilama, keni di pedalobo dao.

⁶Me ma, ena e tǫde bidibo sogo polo peyu ebo. Tama tibaso, eno homugo eno tigi ma usu yaiba homu menio,” Jopgo te po wali.

⁷Jop agai po genina ma weyu, e tama wali, “God, nago koneani, eno e tǫde bidabo sogo te pęwadage mu da, te eno gunidu mobo selama, buluba polo ma soabo tiwai mu dao. Tama tibaso, dwagi yai sogo ena tigiba ma asogobeo.

⁸Bidi dabe augwaligo ena megi subao. Tiali goli, nosali augwaligo ena ma sugobeo. Nago ena gegebo sę yali goli, tama ena olo dali hagalama, nago ena ma sugobeo.

⁹Bidi isibo da, teda aga polo isai bidi dabego buluba pabo. Te pǫ me deli tiwai dagalude bidisąma tedela pai te tiwai dao. Tama bidi dabe te bulude bidibo bage te buluba ma asogobe.

¹⁰Aga aga beba ma asogobe. Tama aga hanigo aga homu kone me egobeo, tama mu gegeda paibao,” wali.

¹¹“Tama eno te homu ebo sogo, eno pedauwali pani sogobeo. Eno haligade gela genuai mu walama, tama ena sęgę genuai mu tolalio. Tibaso, eno po me waibao.

¹²Magi baso nago ena tigidali sogo ena bomonama tonalubo dawe? Nago homugo ena te tamu ąįde bidibo masalai gula tiwai da weyu, eno te nai dabe dolomai homu ebowe?

¹³Eno homugo tibo dao, ena godege piyu, te dene ebo gegeda pogowe homu ebo.

¹⁴Tiali goli, ena pibo sogo nago ena haniani na ilama, tama eno te tobage hwą bidi suyu ebo.

¹⁵Tialima, te sogo eno homugo te tibo kolesagago ena dogoni tola selama, ena isimainao. Eno wei ebe, ena te tigidali me bididu, te tobage sęgę siyu ebo hagela ebo.

¹⁶Ena hagela polo yali. E tǫde bidibo da, ena hagela mu ebo. God, nago enabolo sęge ma menamo, ena sula tagalama, olo bidimainao. Magi baso meni, ena bidibo sogo pęwadage mu yali,” wali.

¹⁷“Da we bidi magi nai dao olama, nago da homu ebo dawe? Magi baso nago da tigidali sogo tonalubo dawe?

¹⁸Magi baso nago dago kolesaga tigidali sogo kigamu osabo dawe? Tama magi baso nago da usu sabo hodo dolisąma ebo dawe?

¹⁹Eno homugo nago gesabidi gasaba begelama, tama ena nago pęwadage sogo naga tonalu homu yali goli da, ena pęsa dalobo doanu usu emainu.

²⁰Eno homugo eno dwai sę ebogo nage mu dolobo, tama nago homugo enabolo sęgę maiabo homu ebawe? Ena te nago enego enebo tą tigi tiwai pedalali, tama nago ene enaba enebo dao. Nago da tonalubo da, te enesigi bidi dabego kalabus bidi tonalubo ąǫ ebo dao. Ma, eno nagebolo genuai sęge maniwe?

²¹Magi baso nago eno sęgę dali, dwai sę dali si tagalobo homu ebewe? Dwasianu sogo ena isama, ena gų pagede pila muaibao. Tama nago ena gegebo sogo, te nago ena munu ma sugobeo,” Jopgo Genuai Bidibolo te po wali.