IOBU 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Taunimanima ena hekwarahi tanobada ai na auka, ani? ena noho dinadia na dava iabina totona e ḡaukaramu tauna ena noho dinadia na heheto ani?

²Hesiai tauna ese ikerukeru e ura heniamu na heto, bona dava iabina totona e ḡaukaramu tauna davana e tahuamu na heto;

³unu mo heto asi anidia huadia e henigu, bona mai hisihisidia hanuaboidia danu.

⁴Na hekuremu negana ai na tomu “Edena nega ai baina tore isi?” A hanuaboi na e daudaumu; na eno marere-marere ranimu.

⁵Hidiogu na uloulo bona miro ese e ḡovaiamu; kopigu na e aukamu, ma e toto loumu.

⁶Egu dina na e lao haraḡamu, dabua ihatuna tauna ena diva na heto; e oremu, asi helarodia.

⁷Ba laloa tao, egu mauri na hahodi tamona na heto. Matagu ese namo basie itaia lou.

⁸E itagumu tauna matana ese basine itagu lou; oi matamu ese e raraigu lalonai baina puki.

⁹Ori na e veve ohomu bona e pukimu na heto, Mase Gabuna ai e dihomu tauna na se dae loumu;

¹⁰ena ruma na nega ta se lou heniamu, ena noho gabuna ai se hedinarai loumu.

¹¹Taunabunai, lau na udugu basina hakapua; mai lalo-hisihisigu ida baina hereva, mai laumagu iditana ida baina maumau.

¹²Lau na davara eiava davara ḡauna badana ta a? Una dainai o itagu taomu a?

¹³Lau na tomamu “Egu mahuta ḡauna ese taugu baine haloa, egu hekure patana ese lalogu baine hamarumarua” negana ai

¹⁴oi ese nihi amo o hagarigumu, bona mata-hanai amo o hagarigu badamu.

¹⁵Taunabunai, hemata bona mase na abi hidimu, turiagu asina lalodiamu.

¹⁶Egu mauri na inai henia badamu; baina mauri hanaihanai asina uramu. Basio haraivagu, badina be egu mauri na hahodi tamona na heto.

¹⁷Taunimanima be dahaka, oi ese o abia daemu, bona o lalo-hadailaiamu?

¹⁸Daba ta ta amo o vadivadi heniamu a? Nega idoinai o tohoa louloumu a?

¹⁹Ba itagu tao ela bona edena nega ai? Basio rakatanigu ela bona tabagu baina hadonoa a?

²⁰Taunimanima i'itataodia Diravana e! Bama kara dika, dahaka bama kara henimu? Dahaka dainai oi ese emu taraki-taraki ḡauna ai o halaogu? Dahaka dainai emu maduna metau ai vada na hahelao?

²¹Dahaka dainai egu kara dika so gwaua taomu? Dahaka dainai egu kara havara so abia ohomu? Badina be harihari lau na tano ai baina hekure; ba tahugu, to basio davarigu