Hiobe 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ŋiczi mâreŋko ʒâic gie sâko bahuc jueŋgopeneŋ, juju dameŋ‐nâŋec i kiŋaŋ qaqa jaŋere juju dameŋ irec sâc.

²Kiŋaŋ qaqazi jâcmumucko ŋeocte ecneekac â gieŋiczi gie furire woŋec juekac.

³Eme no irec sâc jaha ehuc mosane mosane bibiaŋte woŋec maŋgâŋ juekopac, ehame ŋafe sâc ʒâic busâqoc fua‐nareekac.

⁴No waha guŋ fohuc ʒiŋuc muekopac: ‘Hae fureme faharezapo me!’ no risimbiŋne qahuc hae fureocte enareekac hâcne.

⁵Umbeŋ â wânâŋzi sahac‐nane sâcke‐fâreekac, wicnane somieekac, izi mi ʒoraha pupucnerâ mocwâc fâuckeekac.

⁶Wiac âsu biaŋ moc mana manahapene izia rârâŋneekac irec sâc jaha bibiaŋ dameŋ‐nane nowaru‐fâreekac.

⁷“O Anutu, juju‐nane i nokafe sawa, go irec manasuc, juju biaŋ‐nane i biac omaekac.

⁸Go ʒiŋuczia jupe honecnuekiczi juku mocwâc mi honecnucmu, go norao ʒâŋe fihuc juhaŋtec jaha omaepemu.

⁹Karoraczi tâtierâ omaeekac irec sâc jaha omaerâ hâmoc haeo huocmuzi mocwâc mi wefuocmu.

¹⁰E ficticnao mocwâc mi risieocmu, â ehec jumbiŋ jaŋe ine ere nikec‐jopaocmu.

¹¹“No irec hâcne niniŋkerâ dâŋemâc mi ŋepemu, buʒâiczi ɋârâŋkehuc maŋnane kidapeha dâŋ muzepac, ehuc maŋnanezi mana gâpârehuc muheŋɋâŋ ezepac.

¹²No hâwecte oâ sâko iŋucne irec kâpâcwâru bacnukomec me?

¹³No tâpiri ropemurâ waha fomanaekopac, ehuc ʒiŋuc muekopac: ‘Fomanahape ʒâic‐nane mâteŋkezejec!’

¹⁴No iŋuc muhape goki maŋʒâŋe‐nane bâtikietec wiac hâhâwicne hone manac ehuc bipic‐nane taraekac.

¹⁵Iŋuc fua‐nareme bituazore enareekac, ehuc ʒâic busâqoc sâko manahuc hâmozo muekopac.

¹⁶No mâreŋko ʒuhuckerâ jujure takicnukac, juju‐nane i nokafe sawa, irec go behecnuzemec.

¹⁷Ŋic e wemo macticnere manacnetec boc fefene eekac? Â wemo‐ticnere manasucnehuc hone maiŋ ecneekic?

¹⁸Go furic sâc ŋic hone soŋaŋ ejareekic, ehuc eesâicko râec‐jopaekic.

¹⁹Go dameŋ bembeŋne mac moc behecnutec no buc juhuc maŋnane mocwâc fuazac me.

²⁰Go fekicne jukicte no iŋucnezi sâqocne bahuc wemocko moc bawahacguzapo. Go wemocte ma âkendâŋnuhuc tepe motecge norao qâtâcnetec wareekac? Wemocte nore manatec tagi sâkoge tinac epe hetaracnukomec?

²¹Go qaqatara‐nane bârâriehuc kiŋ bahac‐nane wemocte mi bâtâmire‐narekomec? No ʒiŋuczia hâcne ʒâŋeruŋko hurâ fopemu, eme omaehape mocwâc mi bâfuacnucmu.”