Hiop 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ifa usun, eman aramas esap wisen angang weires won fanüfan? Ifa usun, ränin manauan resap wewe ngeni ränin manauen eman aramas mi saata?

²Usun eman chon angang, aramas ra nöüni amanau, a älälei an mochen nonom fän nür, pwal usun eman aramas mi saata a witiwiti liwinin,

³iei usun manauei lon chomong maram esap wor aüchean, nge chomong pwin mi ur ren riaföü ra toriei.

⁴Lupwen üa konola, üa üra, ‘Inet üpwe pwätäsefäl?’ Nge ewe pwin a langatam, üa fokun lupelupekisiei tori a ränila.

⁵Inisi a kula ren wuun me limengau, ünüchei a ponopon, chönü a pwal towu seni kilingauei.

⁶Ränin manauei ra müttirila, lap seni müttirin än eman chon tür äsäp. A tori müchülar, nge esap wor ai apilükülüköch.

⁷Ai Kot, kopwe chechemeni pwe manauei a usun chök eu ngasangas mi müchükai, nge mesei esap chüen künasefäli mine a mürina.

⁸Iwe, chokewe mi künaei iei resap chüen künasefäliei. Lupwen mesom a neto rei, üsap chüen nom.

⁹Usun ekewe kuchu ra ässila o morola, iei usun eman aramas mi feitiu lon lenien sotup esap chüen liwinsefäl,

¹⁰esap chüen fokun liwiniti imwan, nge chon lenian resap chüen silei.

¹¹Iei mine üsap fanafanala, nge üpwe fos fän riaföün letipei, üa ösüngau fän weiresin lelukei.

¹²Ifa usun, ngang ewe matau ika eman mönün lematau mi fokun watte, pwe ka awisa eman epwe mamasaei?

¹³Lupwen üa ekieki pwe ai kon won kiei epwe achipaei, ai möür epwe akisikisala ai cheuch,

¹⁴mürin ka eniuokusuei ren tan, ka eniwaei ren künaei

¹⁵pwe üpwe filätä ai üpwe kak o mäla, lap seni ai üpwe chök riaföü ren samaun inisi.

¹⁶Üa anioputa manauei, üsap chüen mochen manau. Kopwe likitiei, pun ränin manauei ra usun chök eu ngasangas mi müchükai.

¹⁷Pwota ka kon aücheani eman aramas? Pwota ka nenengenifichi mine a föri?

¹⁸Ka cheki i iteiten lesosor, ka sotuni iteiten fansoun.

¹⁹Inet kopwe nenne seniei? Kopwe likitiei ekis chök tori üpwe oromalong chönün awei.

²⁰Nge are üa tipis, met kopwe osupwang ren, en chon mamasa aramas. Pwota üa eu lenien ännen me reöm? Pwota üa eu pisek mi chou me reöm?

²¹Pwota kosap amusala ai pupungau o angei seniei ai föföringau? Pun arapakan chök üpwe kon lon peiasei. En kopwe küttaei, nge üsap chüen nom.”