Iyyooba Maxaafaa 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Biraa bookki kessiyoosainne worqqaa geeshshanau seerissiyoosai de7ees.

²Biratai asai biittaappe bookkin kiyees; nahaaseekka a shuchchaa seerissin kiyees.

³Asai xomppiyaa ehiidi, xumaa xoonees; biittaa xaggaa gakkidi, sakkana xumaa giddon he shuchchaa koyees.

⁴Asai de7iyoosaappe haakkidi, asaa tohoi yedhdhi erennasaa biidi, hegan ciimma ollaa bookkees; bookkidi hegan wodoruwan yaanne haanne kuulumuliiddi, asaappe shaahettidi de7ees.

⁵Kattai biittaappe mokkees; shin he biittaa giddoi taman seeridi, aadhdhi aadhdhi wodhdhees.

⁶He biittaa giddon de7iya shuchchaappe sampperiyaa giyo al77o shuchchai kiyees; a baanaa giddoppekka kulkka worqqai beettees.

⁷“He shuchchaa bookkiyoosaa efiya ogiyaa xinggillee erenna; gaceekka be7ibeenna.

⁸Hanttaara do7ati bantta tohuwan he sohuwaa yedhdhi erokkona; gaammoikka hegaara kanttenna.

⁹“Asi mino zaallaa mentterettees; deriyaakka bookkidi, xaphuwaappe aatti yeggees.

¹⁰Zaallaa lukkidi, kanttiyo ogiyaa kessidi, he al77o shuchchaakka demmees.

¹¹Haattai he sohuwau goggennaadan zeerees; geemmidabatakka poo7uwau kessees.

¹²“SHin aadhdhida eratettai awappe beettanau danddayii? Akeekai beettiyoosai awee?

¹³Asi a tumu waagaa erenna; aissi giikko, aadhdhida eratettai paxa de7iyaageetu giddon beettanau danddayenna.

¹⁴Abbaa ciimmai, ‘Aadhdhida eratettai ta giddon baawa’ yaagees.

¹⁵“Aadhdhida eratettai worqqan woikko biran shamettenna.

¹⁶Aadhdhida eratettai muruta worqqan, maragidiyaanne sampperiyaa geetettiya al77o shuchchan shamettenna.

¹⁷Worqqainne heregaappe oosettida miishshatu waagai aara likettenna; worqqaappe oosettida al77obankka laamettenna.

¹⁸Aadhdhida eratettaa waagai zaagooliyaappe, almmaaziyaappenne inqqo ubbaappe aadhdhees.

¹⁹Tophaaziyooniyaa giyo Toophphiyaa inqqoikka aara likettenna; muruta worqqankka shamettenna.

²⁰“Yaatin, aadhdhida eratettai auppe yii? Akeekai beettiyoosai awee?

²¹Paxa de7iya mereta ubbaappe geemmi uttiis; saluwaa kafotikka a demmokkona.

²²Bashshainne haiqoi, ‘Nuuni aadhdhida eratettau odo xalaalaa nu haittan siyida’ yaagoosona.

²³“Aadhdhida eratettaakko efiya ogiyaanne i de7iyo sohuwaa eriyai Xoossaa xalaala.

²⁴Aissi giikko, Xoossai sa7aa gaxaa ubbaa xeellees; xeellidi salotuppe garssaara de7iyaabaa ubbaa be7ees.

²⁵Xoossai carkkuwaassi wolqqaa immido wodenne shaaraa haattaa likkido wode,

²⁶iraikka awan bukkanaakko, dadaikka awan wodhdhanaakko wogaa wottido wode,

²⁷i he wode, aadhdhida eratettaa be7iis; be7idi paacciis; paaccidi, lo77o giis.

²⁸Hegaappe guyyiyan, Xoossai asaassi odiiddi, ‘Xoossaassi yayyiyoogee aadhdhida eratetta; iitaappe haakkiyoogeekka akeeka’ yaagees” yaagiis.