1Na koa nana sa pou hoke ta geli vagi sa siliva, meke sa vasina hoke tava via sa qolo.
2Aeana si ta vagi vurana pa pepeso, meke kopa si ta vagi vurana pa patu ṉiṉiradi.
3Sa tie si zukea sa vasina hupohuporona; hata si asa pa korapana sa pepeso koari na pou lohidi, hata ia sa sa patu sapu koa ia kopa pa korapa huporo.
4Gelia sa sa pou pa vasina sapu seu pa kinoa tie, vasina sapu lopu hoke ene kamoa tie; na iku si tuqea sa meke isu gore pa pou.
5Na ginani si toqolo vura koari linetelete panaulu, ba pa kauruna si tava umumu sari pepeso pa gineli.
6Vura koari na patu vasina si ari na patu buma ṉedaladi, meke pa kavurudi koa sa qolo.
7Loke kurukuru tapuru va ululu ele poho ia sa siraṉa la vasina, na atata ba lopu ele dogoria.
8Na kurukuru ṉame nomadi ba lopu ele neti kamoa, na laione ba lopu ene luli i sari siraṉa arini.
9Seke pani rina tie sari patu ṉiṉiradi, pa hubi toqere si geli veko palae si arini.
10Geli nuquri rini sari patu ṉiṉiradi, meke kamoi sari na patu arilaedi.
11Hata vura nia sa vasina bukaha vura sa kolo, meke va vurai pa kalalasa sari tiṉitoṉa tomedi.
12Ba pavei kote boka ta vagi sa ginilagilana lohina? Pavei koa sa ginilagilana?
13Lopu tumae nia rina tie sa laena hinokara, sina loke tie boka dogoria koasa popoa pepeso.
14Sa kolo pa hebalana si zama, ‘Lopu koa koa rau si asa.’ Sa lamana peava si zama, ‘Lopu koa koa rau si asa.’
15Na qolo viana lopu kote boka holu vagi nia, na siliva si lopu tata kamo pa hinoluna.
16Sa qolo pa Opira ba lopu tata kamoa sa laena sa, lopu tata tugo sari na patu arilaedi pu ziṉara na buma leleadi.
17Lopu boka vari pada la nia koari na qolo babe na qelasi ṉedaladi, meke lopu boka kapae la nia tugo koari na vinasari ṉedaladi sapu na qolo tavete ni rini.
18Arilaena hola nia sa tugo sari na patu binu na patu ziṉara; sa laena sa ginilagilana lohina si lopu boka ta kamo.
19Sa patu topazi memehena meke sa qolo viana, ba lopu kaqu boka vari pada la nia koasa laena sa.
20Ke pavei mae guana sa ginilagilana lohina? Pavei kokoana sa ginilagilana?
21Na ta tome sia pa matadi rina tie, koari na kurukuru pa galegalearane ba paere si asa.
22Sa minate meke lovu si zama, ‘Na inavoso hoborodi mo si kamo pa taliṉa mami.’
23E Tamasa mo telena tumae nia sa siraṉa pude kamo la koa sa; Asa mo gilania pavei koana si asa.
24Ura Asa boka dogoro kamoa sa vina betona sa kasia popoa; doduru pa kauruna sa maṉauru ba dogori Sa.
25Totoso ponia ṉiniraṉira sa Tamasa sa givusu, meke tavete vura nia Sa sa padana sa kolo koari na lei,
26meke totoso vizatia Sa pavei kote hoqa sa ruku, meke sa siraṉa tanisa lei tana paka maṉauru,
27si tiqe doṉo la si Asa koasa ginilagilana lohina meke vilitia Sa, meke va sosodea Sa meke podekia Sa.
28Meke zama sa Tamasa koari na tie, ‘Sa pinamaṉana sa Tamasa, asa tu si na ginilagilana lohina, meke pude luara pania sa hahanana kaleana si na ginilae.’ ”
