Job 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Duen menge minahan he zutun egketuredu is menge pelata, wey zuen menge lugar he zutun edtunawa is menge vulawan.

²Is putew egkekuwa puun te tanà, ne is brunsi edtunawen puun te vatu.

³Egamit is menge etew te sulù su para kenà sikandan merusiremi is egkalut diyà te utew zizalem he vahin te tanà. Egkalut dan te menge vatu ziyà te kinezizeleman.

⁴Egkalut dan te veyeey ziyà te minahan, diyà te lugar he wazà ubpai wey wazà beyai te menge etew. Ebpenaug dan pinaaǥi te menge pisì he edsayugsayug.

⁵Diyà te zivavew he tanà edtuvù is menge pinemula he ebpuunan te keenen, piru ziyà te zizalem kayi henduen be te mibpurma te hapuy.

⁶Is menge vatu zutun duen menge sapiru ne is eliyavuk dutun duen menge vulawan.

⁷Is menge veyeey pehendiyà te minahan, wazà maahà te menge uwak etawa menge banug,

⁸wey wazà egkeveyaan dutun te zumezaas he menge langgam etawa erimaung.

⁹Egkeluten te menge etew is kinezesenan he menge vatu minsan diyà te zizalem he vahin te menge vuntud.

¹⁰Ebudsiyan dan is dezekelà he menge vatu, su para zuen dan egkeveyaan, ne egketuredu zan is nekedseselekawà he klasi te mahalen he menge vatu.

¹¹Egkalut dan te ebpuunan te menge wahig, ne ed-uwiten dan diyà te merayag is nekeeles dutun he menge ketiǥeyunan.

¹²“Piru hendei ves egkaahà is ketau wey kedsavut?

¹³Wazà metueni te etew ke hendei heini egketuredu. Kenà heini egketuredu kayi te kelibutan.

¹⁴Kenà daan heini egketuredu minsan diyà te kinezizeleman te zaǥat.

¹⁵Kenà heini egkepemasa te vulawan etawa selapì.

¹⁶Kenà ebpekerepeng te vali kayi is bali te lunsey he vulawan etawa mahalen he menge vatu he uniks wey sapiru.

¹⁷Lavew pa heini te vulawan etawa kristal. Kenà heini egkeliwaan te elahas he vulawan.

¹⁸Is bali kayi lavew pa te vali te paǥang, haspi, etawa rubi.

¹⁹Kenà heini egkerepengan te tupasyu he ebpuun diyà te Etiopia, wey kenà heini egkepemasa te lunsey he vulawan.

²⁰“Ne hendei ves egkaahà is ketau wey is kedsavut?

²¹Wazà linimbag he egeǥehinawa he ebpeketuredu kayi minsan pa is menge tagbis.

²²Minsan diyà te lugar te kezeetan he iyan is lugar te menge minatey ne vinèbeelan dà he tudtul mehitenged kayi is nezineg diyà.

²³Megbevayè dà is netau ke hendei egketuredu is ketau.

²⁴Su egkeehè din is minsan diyà te utew meziyù he vahin te kelibutan, ne egkeehè din is langun diyà te sihung te langit.

²⁵Hein inhiyup din is keramag, wey hein midsukud din ke sengemenu kezekelà is uzan he ibpetanè din,

²⁶wey hein midisisyunan din ke hendei zin ibpetanà is uzan wey ke hendei zin ibpevayà is kilat he egkezumahan te ruǥung,

²⁷iyan haazà timpu te kebpaahaa zin te ketau wey is ikemahal kayi. Migezaman din heini ne nekeuyun sikandin.

²⁸Ne migkaǥi sikandin diyà te menge etew te, ‘Egkehimu he zuen niw ketau wey kedsavut emun edtehuzen niw is Nengazen wey edlikey kew te mezaat he ulaula.’ ”