Hiobe 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Mâreŋmaŋko siliwa â gol fokac i ŋic jaŋe wise gufuc ehuc rorâ ʒocko rike dockepie ɋaɋackeekac.

²Erâ aeŋ omane â bâbâroŋ iŋuc jaha mâreŋmaŋko qânâhec bobohotac erâ fokac i ŋic jaŋe wâc wise gufuc ehuc rorâ ʒocko rike dockepie wosâeekac.

³Mâreŋmaŋko duŋdapâc fokac i ŋic jaŋe lambezi batamaepie omaeekac, ehame ira qânâ wiac forakac irec fuŋne mananiŋte wise gufuc ehuc gie sâko baeŋgopieŋ.

⁴Jaŋe ŋic jujuo me rac warec eeŋgopieŋko mâcne, taicko sawa hawec sâko wise gufuc ehuc repao hurâ qaŋatierâ domahuc ŋiczi hone manac mi ejarehapie gie baeŋgopieŋ.

⁵Mâreŋ fainao nânâ monʒaŋ fuarâ foekac, â maŋnao wiac foraekac i ine ʒoczi qânâ ʒâtâcne fâuckerâ foekac irec sâc.

⁶Mâreŋ maŋnao qânâ gâcne bâfuaeŋgopieŋ i qânâ furi sâko, â qânâo gol uucnezi wâc bohotarâ foekac.

⁷“Hawec gufueŋgopieŋ irec maŋne i piʒu piʒu jaŋe mi honeeŋgopieŋ, â tucwipe jaŋe wâc irec faicnao mi sâoeŋgopieŋ.

⁸Laioŋ jaŋe mecne me qowi momori gâcne jaŋe mecne mâreŋ ira rac warec moc mi eeŋgopieŋ.

⁹“Ŋic jaŋe haroŋaŋ sâko henʒaŋ qanʒaŋneeŋgopieŋ, erâ tiki fuŋnao wise gufuc epie tiki jaŋe rândiŋkeeŋgopieŋ.

¹⁰Tiki maŋnao qânâ sanaŋ fokac i gufu koparic ehuc qânâ furi sâko bâfuaeŋgopieŋ.

¹¹Erâ opâ hatane hatane i hebâzickehuc mâreŋ maŋnao wâcwiac soŋkerâ fokac i wâc bataniŋkeeŋgopieŋ.

¹²“Maŋɋârâŋte fuŋne i wenirec bâfuazo?  mamana tara irec fuŋne i wena fokac?

¹³Ŋic nâŋâc irec hata moc mi manaeŋgopeneŋ, â ŋic jujune nâŋâcne mâreŋko sâcne mi bâbâfuane.

¹⁴Hâwec ʒâkâŋ sâko fâhâŋnaonec dâŋ ʒiŋuc wefukac: ‘Maŋɋârâŋ i norao bâbâfuane mi ekac.’

¹⁵Maŋɋârâŋ i golzi rorone mi ekac, â siliwazi furi bapane wâc mi fokac.

¹⁶Maŋɋârâŋ i Ofiri mâreŋko gol fokac ihec sâc hehene mi ekac, erâ qânâ furi sâkore furizi irec sâc wâc mi bâfuakac.

¹⁷Maŋɋârâŋ i gol irec sâc boc sirickekac, erâ eri wiac gol â galasi furi sâkozi bakicne irec sâc mâmâc jâurukac.

¹⁸Maŋɋârâŋ i wiac qame hukicne, qânâ furi sâko fuŋne fuŋne irec sâc siricke‐fârekac hâcne.

¹⁹Maŋɋârâŋ i wiac qeŋ bipinehec, irec qânâ furi sâko bâbâŋeŋ me gol ɋaɋacne ihec sâc hehene mi ekac.

²⁰“Hâc, eme maŋɋârâŋ i wenirec fuaekac, â mamana tara irec fuŋne wena fokac?

²¹Wiac jujune jaŋe sâcne mi honeeŋgopieŋ, â sawa wipe jaŋe fururuc qahuc wâc mi honeeŋgopieŋ.

²²Erâ hâmoc â sisipiric jahe ʒiŋuc mukopirec: ‘Nâhe irec biŋe bâroŋ sawa manaekoperec.’

²³“Anutu e irec fuŋne buc manaekac, â maŋɋârâŋ wena bâbâfuane i eki wâc buc manaekac.

²⁴Eki hâcne ʒâŋe fime rame mâreŋ qaŋeŋne honeekac, â sambâŋ rurumaŋnao wiac sasawa fokac i hone‐fâreekac wâc.

²⁵Eki hâcne mâŋâŋ tâpiri‐ticne râcnewec, erâ hâwec sâcticne wâc mutâcnewec.

²⁶Erâ ekizia wâc hoezi wena heocte mupaŋkewec, â karoraczi gâpâreha bâbâriczi ɋuŋ parandaŋte hata baocte mucnewec.

²⁷Anutu e dameŋ ira hâcne maŋɋârâŋte fuŋʒuhucne hone tararâ bataniŋkewec, erâ basanaŋkehuc irec fuŋne mutaniŋkewec.

²⁸Ehuc ŋic kecʒiŋuc jazawec: ‘Manaŋgopieŋ, Wofuŋ araŋ babacne izi maŋɋârâŋ fârine, erâ hehesic râpeckerâ juju izi mamana tara fârine.’”