Sohp 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mie pwoahr en silper pahn pwehl; Mie wasahn kamwakelehda kohl.

²Aramas kin weirada mete sang pahn pwehl Oh inim takai oh kapeieisang kahper loale.

³Aramas kin lel wasa me keieu rotorot pahn pwehl. Re kin wie roporop lellahng pahn kepin sampah Oh weirada takai sang wasa rotorot.

⁴Dohsang wasa me aramas kin kousoan ie De wasa me nehn aramas saikinte sok ie Aramas kin weirada pwoahr loal kan pwe re en rapahki takai kesempwal kan. Re kin wie doadoahk nan ar sangat, Doudouki sahl nan pwoahr akan.

⁵Kisin mwenge kin wosada sang nin sampah, Ahpw pil pahn kepin sampahohte Soahng koaros kin ohla oh mwutpene.

⁶Sapair kin aude takai kan en sampah, Oh kohl nan pwelpar.

⁷Sohte likoht kin kilang elen kolahng wasahn dipwisou kesempwal pwukat, Oh sohte puldur kin pihr wasa pwuko.

⁸Sohte laion de mahn kommwad Kin alu nan ahl tehn pwukat.

⁹Aramas kin weirada takai me keieu teng, Weirada nahna kan leldilahng pahn kapi.

¹⁰Ni ar kin weweir pwoahr kohla nan takai kan, Re kin diarada kisin takai kesempwal akan.

¹¹Re kin weiredi lel pahn kepin pihl akan Oh kin walahng nan marain dahme rir.

¹²Ahpw ia wasa me aramas kak diar ie kupwurokong? Ia wasa me kitail kak padahngki ie duwen dehdehki?

¹³Kupwurokong sohte kak dierek nanpwungen aramas akan; Sohte me ese ia uwen kesempwalpe.

¹⁴Pahn kepin madau oh sehd kan Koasoia me sohte kupwurokong kak dierek wasa pwuko.

¹⁵Sohte me kak pwainkihda silper de kohl.

¹⁶Kohl oh kisin takai me keieu kaselel Sohte pahrekiong kesempwalpe.

¹⁷E inenen kesempwal sang kohl, Sang kep en kohl oh kilahs kaselel.

¹⁸Kupwurokong kesempwal sang Audepen madau lingan kan de krisdal de rupi kan.

¹⁹Topas me keieu kaselel oh kohl keieu mwakelekel Sohte kak pahrekiong kesempwal en kupwurokong.

²⁰Eri, ia poahsoan en kupwurokong? Ia wasa me kitail kak padahngki ie duwen dehdehki?

²¹Sohte mehkot mour kak kilang, Pil menpihr me pipihrseli kan sohte kak kilang.

²²Pil mehla oh mwomwla Koasoia me ira rongorongete koasoiepe.

²³Koht kelehpw me mwahngih ahlo, Mwahngih wasa me kupwurokong mihmi ie,

²⁴Pwehki eh ketin mwahngih imwin sampah, Mwahngih mehkoaros pahnlahng.

²⁵Ni ahnsou me Koht ketikihong manaman kisinieng Oh kupwurehda ia pahn laud en madau;

²⁶Ni ahnsou me Koht kupwurehda wasa me keteu pahn mweresang ie, Oh ahl me depwek en nansapwe pahn keid ie;

²⁷Iei ih ahnsowo me e ketin masanihada kupwurokong oh song ia uwen kesempwalpe— E ahpw ketin kamanahla.

²⁸Koht eri mahsanihong aramas, “Pwe kumwail en loalokongla, kumwail uhdahn pahn lemmwiki Kaun-o. Pwe kumwail en dehdehki, kumwail uhdahn pahn sohpeisang me suwed.”