Job 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Job bin kipgon tok, “Wen enibodi wandim gol en silba im garra go en grajim det graun, en afta im garra barnimap det gol en silba langa det faiya blanga meigim im jidan brabli klinbala en brabli shainiwan.

²En im oldei dum lagijat igin langa det aiyan en kopa.

³Ola wekinmen oldei garrimap lemp blanga gowin insaid langa det dakbala pleis blanga lukabat blanga detlot ting na.

⁴Dei grajim det hol longwei brom weya olabat jidan en olabat taiyimap miselp garram roup en godan langa det brabli dipwan hol.

⁵Longwei andanith langa ola fam weya dei growimap ola sid daga, olabat meigim bigbala faiya blanga breigimap ola rok,

⁶weya im abum ola purdiwan ston en gol.

⁷“Detlot wekinmen oldei go longwei andanith langa det graun weya ola igulok kaan luk en weya ola laiyan nomo sabi.

⁹Garram olabat ronwan bingga, olabat oldei mubumweibat detlot shapwan rok en dei deigimat ola rok brom brabli bigwan hil.

¹⁰Olabat oldei grajim det graun thru langa ola rokiwan pleis blanga lukabat blanga ola purdiwan ston en najalot gudwan rok.

¹¹Olabat faindim weya detlot riba bin stadap en langa najalot sigridwan pleis.”

¹²Wal Job bin kipgon tok, “Hau pipul garra faindim det wei blanga God? Hau pipul garra len en sabi det trubalawei?

¹³Nomo enibodi gin faindim det wei.

¹⁴Dei kaan faindim langa brabli dipwan solwoda.

¹⁵“Det wei blanga God im mowa gudwan langa detlot silba en brabli gudwan gol en langa detlot purdiwan ston.

¹⁷Nomo enijing iya jidan lebul langa det wei, nomo gol o glas.

¹⁸Det wei blanga God im mobedawan langa ol detlot purdiwan ston gulum koral, jespa en rubi.

¹⁹Det wei im mobedawan langa detlot purdiwan en yelawan ston gulum topes en gol.

²⁰Bat hau pipul garra faindim det wei blanga God? Hau pipul garra len en sabi det trubalawei?

²¹Ola pipul en enimul en bard oldei lukaranbat blanga im, bat dei kaan faindim im, najing.

²²Detlot dedbala pipul langa greibyad nomo sabi weya blanga faindim im.

²³Oni God imselp sabi det wei,

²⁴dumaji im gin luk ebrijing iya langa dijan graun.

²⁵Wen God bin kadimat det win en woda,

²⁶en wen imbin jinggabat blanga jandim rein en laitining,

²⁷imbin meigim det trubalawei.

²⁸God bin dalim langa wi, ‘If yu rispek langa mi, wal yu garra sabi main trubalawei en yu garra libum det nogudbalawei.’”