Ayup 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹— «Shübhisizki, kümüsh tépilidighan kanlar bar, Altunning tawlinidighan öz orni bardur;

²Tömür bolsa yer astidin qéziwélinidu, Mis bolsa tashtin éritilip élinidu.

³Insanlar yer astidiki qarangghuluqqa chek qoyidu; U yer qerigiche charlap yürüp, Qarangghuluqqa tewe, ölümning sayiside turghan tashlarni izdeydu.

⁴U yer yüzidikilerdin yiraq jayda tik bolghan quduqni kolaydu; Mana shundaq adem ayagh basmaydighan, untulghan yerlerde ular arghamchini tutup boshluqta pulanglap yüridu, Kishilerdin yiraqta ésilip turidu.

⁵Ashliq chiqidighan yer, Tekti kolan'ghanda bolsayalqundek körünidu;

⁶Yerdiki tashlar arisidin kök yaqutlar chiqidu, Uningda altun rudisimu bardur.

⁷U yolni héchqandaq alghur qush bilmeydu, Hetta sarning közimu uninggha yetmigen.

⁸Hakawur yirtquchlarmu u yerni héch dessep baqmighan, Esheddiy shirmu u jaydin héchqachan ötüp baqmighan.

⁹Insan balisi qolini chaqmaq téshining üstige tegküzidu, U taghlarni yiltizidin qomuriwétidu.

¹⁰Tashlar arisidin u qanallarni chapidu; Shundaq qilip uning közi herxil qimmetlik nersilerni köridu;

¹¹Yer astidiki éqinlarni téship ketmisun dep ularni tosuwalidu; Yoshurun nersilerni u ashkarilaydu.

¹²Biraq danaliq nedin tépilar? Yorutulushning makani nedidu?

¹³Insan baliliri uning qimmetliklikini héch bilmes, U tiriklerning zéminidin tépilmas.

¹⁴Yer tégi: «Mende emes» deydu, Déngiz bolsa: «Men bilenmu bille emestur» deydu.

¹⁵Danaliqni sap altun bilen sétiwalghili bolmaydu, Kümüshnimu uning bilen bir tarazida tartqili bolmas.

¹⁶Hetta Ofirda chiqidighan altun, aq héqiq yaki kök yaqut bilenmu bir tarazida tartqili bolmaydu.

¹⁷Altun we xrustalnimu uning bilen sélishturghili bolmaydu, Ésil altun qacha-quchilar uning bilen héch almashturulmas.

¹⁸U ünche-marjan, xrustalni ademning ésidin chiqiridu; Danaliqni élish qizil yaqutlarni élishtin ewzeldur.

¹⁹Éfiopiyediki sériq yaqut uninggha yetmes, Sériq altunmu uning bilen beslishelmeydu.

²⁰Undaqta, danaliq nedin tépilidu? Yorutulushning makani nedidu?

²¹Chünki u barliq hayat igilirining közidin yoshurulghan, Asmandiki uchar-qanatlardinmu yoshurun turidu.

²²Halaket we ölüm peqetla: «Uning shöhritidin xewer alduq» deydu.

²³Uning mangghan yolini chüshinidighan, Turidighan yérini bilidighan peqetla bir Xudadur.

²⁴Chünki Uning közi yerning qerigiche yétidu, U asmanning astidiki barliq nersilerni köridu.

²⁵U shamallarning küchini tarazigha salghanda, Dunyaning sulirini ölchigende,

²⁶Yamghurlargha qanuniyet chüshürginide, Güldürmamining chaqmiqigha yolini békitkinide,

²⁷U chaghda U danaliqqa qarap uni bayan qilghan; Uni nemune qilip belgiligen; Shundaq, U uning bash-ayighigha qarap chiqip,

²⁸Insan'gha: «Mana, Rebdin qorqush danaliqtur; Yamanliqtin yiraqlishish yorutulushtur» — dégen».