Yoobu 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yoobu u nɛɛ, tɔmbɑ yɛ̃ mìn di sii ɡeesu kɑ wurɑ yɑ rɑ yɑri bu sere ye teɑ.

²Tem diyɑ bɑ rɑ mɑɑ sisu wunɛ, kpɑ bu sii ɡɑndu sɔwɑ kperun di.

³Be bɑ sisu sɔwɑmɔ, sere tem sɔɔwɔwɑ bɑ rɑ kɑ fitilɑ du kpɑ bɑ n duɔ sere mi su wɑ̃ɑ yɑm wɔ̃kuru sɔɔ,

⁴kpɑ bu wɔru ɡbe sere tem sɔɔwɔ, bu swɑɑ wĩɑ mi, mi ɡoo sɑri. Bɑ ǹ kpɛ̃ bu sĩ mi. Wɛ̃ɛyɑ bɑ rɑ n ɡɑsirimɔ bu kɑ du mi.

⁵Tem wɔllɔwɑ dĩɑnu rɑ kpi. Adɑmɑ mɛn sɔɔwɔ, n sɑ̃ɑwɑ nɡe ɡɑ̃ɑnu kpuro dɔ̃ɔ mwɑɑre.

⁶Tem sɔɔ miyɑ kpee ɡobiɡinu rɑ n wɑ̃ɑ. Mi sɔɔrɑ bɑ rɑ mɑɑ wurɑ wɑ.

⁷Kɑsɑ yɑ ǹ swɑɑ ye yɛ̃. Mɛyɑ mɑɑ yɑbereku ɡɑ ǹ ye wɑɑre.

⁸Gbee sunɔ kɑ yɛɛ yi yi tii nɑɑnɛ sɑ̃ɑ yi ǹ ye mwɑɑre.

⁹Adɑmɑ tɔnu u kɑ̃kɑ u kperu wɔri u kɔsukɑ, sere u ɡuunun kpɛɛkpɛɛku ɡirɑri.

¹⁰Kpee ten nɔɔwɔrɑ u rɑ swɛɛ wunɛ, kpɑ u ɡɑ̃ɑ ɡee ni wɑ, ni nu wɑ̃ɑ mi.

¹¹Ù n nim kɑmɛ sɔɔ mi, u rɑ mu swɑɑ ɡɑnɛwɑ, kpɑ u kɑ dukiɑ yɑrimɑ ye yɑ beruɑ sɔɔ mi.

¹²Adɑmɑ mɑnɑ tɔnu u koo kpĩ u bwisi wɑ. Mɑnɑ yi sikɑ.

¹³Tɔnu kun yin ɡobin ɡeeru yɛ̃. Domi yi ǹ wɑ̃ɑ hɑnduniɑ yeni sɔɔ.

¹⁴Yi ǹ wɑ̃ɑ dɑɑrɔ. Yi ǹ mɑɑ wɑ̃ɑ nim wɔ̃ku sɔɔ.

¹⁵Bɑ ǹ kpɛ̃ bu kɑ yi wurɑ kɔsinɑ. Bɑ ǹ mɑɑ kpɛ̃ bu yi dwe kɑ sii ɡeesu.

¹⁶Bɑ ǹ kpɛ̃ bu yi weesinɑ kɑ wurɑ ye yɑ wee Ofirin di, ǹ kun mɛ kɑ kpee ɡobiɡii ni nu nɔni booɡu kɑ bɛrɔ wuru mɔ.

¹⁷Bɑ ǹ kpɛ̃ bu yi weesinɑ kɑ diɡi, ǹ kun mɛ kɑ nɔrɑ ye bɑ kuɑ kɑ wurɑ,

¹⁸kɑɑ sere ɡere kpee ɡobiɡii ni bɑ sokumɔ korɑi kɑ kirisitɑli? Bwisi yi kpee ɡobiɡinu bɛɛrɛ kere.

¹⁹Bɑ ǹ kpɛ̃ bu kɑ yi Etiopin kpee ɡobiɡii ni nu nɔni dɔm buuru mɔ weesinɑ. Bɑ ǹ mɑɑ kpɛ̃ bu yi weesinɑ kɑ wurɑ ɡeɑ.

²⁰Ǹ n mɛn nɑ, mɑn diyɑ bwisi yi wee. Mɑnɑ yin nuurɑ wɑ̃ɑ.

²¹Tɔnu kun kpɛ̃ u yi wɑ kɑ nɔni. Gunɔ ɡe ɡɑ yɔ̃ɔwɑ ɡɑ ǹ kpɛ̃ ɡu yi wɑ.

²²Gɔɔ kɑ ɡɔribun wɑ̃ɑ yerɑ koo nɛɛwɑ, yin ɡɑriyɑ bɑ nɔɔre tɔnɑ.

²³Gusunɔ turowɑ u bwisin swɑɑ yɛ̃. Wiyɑ u mɑɑ yin wɑ̃ɑ yeru yɛ̃.

²⁴Domi wiyɑ u hɑnduniɑn ɡoonu nnɛ kpuro wɑɑmɔ. U mɑɑ kpuro wɑɑmɔ ye yɑ wɑ̃ɑ tem sɔɔ.

²⁵Sɑnɑm mɛ u wom bunum mɛɛrɑ mɑ u nim kpɑ̃ɑru mɛɛrɑ,

²⁶kɑ sere swɛɛ yi ɡurɑ koo swĩi yu kɑ nɛ, kɑ mɑɑ swɛɛ yi ɡuru mɑɑkinu kɑ ɡuru ɡbɑ̃sukubu koo swĩi,

²⁷yerɑ u bwisi yi wɑ. Mɑ u yin ɑsɑnsi wɛ̃ɛrɑ u yi.

²⁸Sɑɑ yerɑ u tɔmbu sɔ̃ɔwɑ u nɛɛ, bu nùn nɑsio, yerɑ yɑ sɑ̃ɑ bwisi. Wi u mɑɑ kɔ̃sɑ ɡɛɛrɑri, wiyɑ u bwisi mɔ.