Job 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Cak ham a khorhui om tih sui ham khaw a ciil nah hmuen om.

²Thicung khaw laipi lamloh a loh tih lungto te rhohum la a tlae.

³A bawtnah te a hmuep neh a khuetnah a cungkuem hil a khueh. Anih loh lungto te a hmuep neh dueknah hlipkhup ah khaw a hoem.

⁴Soklong te aka bakuep taeng lamloh a yoe tih kho neh caeh khaw a hnilh uh. Hlanghing lamkah aka tlayae rhoek khaw hinghuen uh.

⁵Diklai amah lamloh buh thoeng tih a hmui ah hmai bangla a om.

⁶A lungto te minhum hmuen tih a taengah sui laipi om.

⁷A hawn te vatlung loh ming pawt tih maisi mik hmu pawh.

⁸Te te sa ca rhoek loh cawt pawt tih te donglong te sathuengca long khaw pawn pawh.

⁹Hmailung soah a kut a hlah tih tlang pataeng a yung ah a phil.

¹⁰Sokko lungpang dongah a khoel tih umponah cungkuem khaw a mik loh a hmuh.

¹¹Tuiva tuilong khaw a kueng tih olhuep te khosae la a khuen.

¹²Tedae me rhoek ah nim cueihnah a hmuh tih yakmingnah hmuen he menim?

¹³A phu te hlanghing loh ming pawt tih mulhing khohmuen ah a hmuh moenih.

¹⁴Tuidung loh, “Te te kai ah moenih,” a ti tih tuitunli loh, “Kai taengah moenih,” a ti.

¹⁵Te ham te cui cilh khaw pae thai pawt tih cueihnah a phu te cak khaw a khiing pah.

¹⁶Ophir sui nen khaw, oitha lung vang nen khaw minhum nen ting pawh.

¹⁷Te te sui neh canglung neh tluk pawt tih a hnothung he suicilh hnopai bal moenih.

¹⁸Maerhuhlung neh disaehlung khaw thui lawk pawt tih cueihnah rhovoep tah lungvang lakah then.

¹⁹Te te Kusah vaya nen khaw tluk pawt tih sui cilh nen khaw ting pawh.

²⁰Te dongah cueihnah he me lamkah nim ha pawk tih yakmingnah hmuen he menim?

²¹Mulhing boeih kah mik lamloh a thuh pah tih vaan kah vaa taeng lamloh a thuh.

²²Abaddon neh dueknah loh, “A olthang te kaimih hna neh ka yaak uh,” a ti.

²³Pathen loh a longpuei a yakming tih a hmuen te khaw amah loh a ming.

²⁴Amah loh diklai khobawt hil a paelki tih vaan hmui khaw boeih a hmuh.

²⁵Yilh kah a khiing a khueh pah tih tui khaw cungnueh neh a nueh.

²⁶Amah loh khotlan ham rhi a suem tih rhaek ol ham khaw longpuei a khueh.

²⁷Cueihnah te a hmuh tih a tae. Cueihnah te a sikim sak tih a khe bal.

²⁸Hlang taengah khaw, 'Ka Boeipa hinyahnah he cueihnah la om tih boethae lamloh nong he yakmingnah,' a ti,” a ti nah.