IOBU 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Momokani, silver na mai gurina, bona gold na mai ihaḡoevana gabuna;

²auri nd ano lalona amo e abiamu, bona auri labora-labora na nadi ihavevena ai e davariamu.

³Taunimanima ese dibura e hadokoamu, bona daudau masemase gabudia ai e hetahumu; auri nadidia na vabura ai bona dibura masemase ai e tahumu.

⁴Koura ai guri e ḡeidiamu, taunimanima edia noho gabudia na daudau. Laolao taudia ese e lalodia boiomu; dahu ai e tua dobimu, e ḡelomu, e hedave laomu, e hedave maimu.

⁵Tanobada kopina amo aniani e abiamu, a lalona na lahi ese e haveveamu.

⁶Ena nadi na sapairo gabudia; ena ḡahu na gold.

⁷Una dala na vamu e animu manuna ta ese se dibaia, bona bogibada matana ese se itaia.

⁸E heaḡimu boromadia ese asie moia tao, bona leona ese se rakaia hanai.

⁹Taunimanima imadia na nadi-gini aukana ai e dau kau, bona ororo na badidia amo e ḡiḡidia dobi.

¹⁰Nadi badadia ai dadaira e ḡeidia; matadia ese ḡau hereadia iboudiai e itadiamu.

¹¹Sinavai na e koudia ahumu, bena asie manodia urumu, bona hehuni ḡauna na diari ai e veria lasimu.

¹²Aonega na edeseni ai bae davaria? Lalo-parara gabuna be edena?

¹³Taunimanima na ilao-henina dalana asi dibadia; mauri taudia edia tano ai asie davariamu.

¹⁴Dobu gabuna na e tomu “Ia na dia lau lalogu ai”, bona davara na e tomu “Ia na dia lau dekegu ai”.

¹⁵Gold amo basita hoia diba, bona davana na silver amo basita hahetohoa diba.

¹⁶Ofiri gold-na amo davana basita karaia diba, eiava onuku eiava sapairo nadidia amo.

¹⁷Gold eiava glass ida basita haheḡereḡeredia diba, bona gold heraheradia namo-hereadia amo basita hoia diba.

¹⁸Ramoto bona gabisi basita herevalaidia; aonega davana ese peninimi nadidia davadia e hereadiamu.

¹⁹Etiopia ena topasio na ia ida asie heḡereḡere, bona davana na gold goevaḡoevana ai basita gwauraia diba.

²⁰Benaini, aonega na ede amo e maimu? Bona lalo-parara gabuna be edeseni ai?

²¹Ia na mauri ḡaudia iboudiai matadia amo e hehunimu, bona atai manudia edia amo danu.

²²Dobu masemase gabuna aneruna bona Mase na e tomu “Ia harina taina na taiamai amo vada a kamonai Iahulahu”.

²³Dirava na ilao-henina dalana dibana, bona gabuna danu dibana.

²⁴Badina be tanobada dokodia e roho henidiamu, bona ḡau iboudiai guba henunai na e itadiamu.

²⁵Lai ena goada e henia bona ranu e hahetohodia negana ai,

²⁶medu taravana e atua bona guba rahurahu kevaruna dalana e lailaia negana ai,

²⁷ia ese e itaia bona e gwauraia hedinarai; e haginia bona e dibaia vaitani.

²⁸Ia ese taunimanima e hamaorodia, eto: A itaia, Ḡaubada igari-henina, una na aonega; bona kara dika irakatanina, una na lalo-parara.