Job 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne midtavak si Zofar is tig-Naama te,

²“Kinahanglan he edtavak a su henduen be te kenà ebpeketanà is gehinawa ku.

³Midawey ka kedì duma is ked-insultu, ne midsuǥù a te isip ku te kedtavak kenikew.

⁴Siguradu netuenan nu he puun pa te nehuna he timpu, zutun te kedlimbaǥa te etew kayi te seled te kelibutan,

⁵ne edlavey zà is kelipey te lalung he etew. Uya, kenà egkeuǥet is kelipey te etew he wazà medtuu te Megbevayà.

⁶Minsan utew subra is kebpelavew zin, su henduen te ebpekeume en diyà te menge ǥapun,

⁷egkahanew sikandin te wazà pidtemanan iring te tai zin. Is nekekilala kandin egkeinuinu ke hendei en sikandin.

⁸Egkahanew sikandin iring te teǥeinep wey iring te egkelewasan ke mezukilem, ne kenè en sikandin egkaahà.

⁹Kenè en sikandin egkaahà te nekekilala kandin, ne wazè en diyà te lugar he ubpeey zin te nehuna he timpu.

¹⁰Is menge anak din iyan ebayad diyà te menge pubri te tinakew zin diyà te kandan.

¹¹Ebpatey sikandin ne igkeleveng he vetan-en wey mezesen pa.

¹²“Is kebaal te mezaat iring te kegkaan te meemis diyà te vèbà,

¹³ne ebpekeuǥeten is kebpurunga kedsepsepaa kayi su wey mepurung meǥezam is taam din.

¹⁴Piru kebpekeuma kayi ziyà te ǥetek din ne ebmepezes heini ne edhilu iring te hereg te uled.

¹⁵Iring te keenen he egkeutà, egkeutà te lalung he etew is tinakew zin. Minsan diyè en heini te ǥetek din ne ibpeuta heini kandin te Megbevayà.

¹⁶Iring sikandin te edsupsup te hereg te uled he iyan ibpatey zin.

¹⁷Kenè din en egkeǥezaman is taam te zekelà he lana, gatas wey teneb, he henduen be te edtudà he zezeisey wey zezekelà he menge wahig.

¹⁸Kenà sikandin ebpekezawat te veǥas te kedhaǥù din. Kenà sikandin ebpekelipeylipey pinaaǥi te ketiǥeyunan din.

¹⁹Su midaagdaag din is menge pubri wey mibey-anan din is ebpemenlised. Mid-angken din is menge valey he kenà kandin.

²⁰Minsan dekelà is azen din tenged te kebpeleleǥed din ne kenà sikandin egkeperahan. Ne kenà ebpekelibri kandin is langun he egkesuatan din.

²¹Wazè en egkesamà diyà te kandin he egkekaan din, su egkahanew is ketiǥeyunan din.

²²Dutun te timpu he zekelà is azen din, egkeumahan sikandin te kelised. Utew subra he elentusen is ebpekeuma ziyà te kandin.

²³Edhentayen sikandin te Megbevayà te kemeresayan. Ibpeǥezaman kandin te Megbevayà is dekelà he pauk din, ne ebpeuzanan din te silut.

²⁴Minsan egkelikayan din is putew he ǥumaan, egketiyuk gihapun sikandin te brunsi he vesut te panà.

²⁵Egketiyuk is epezu zin, ne edlehusan dutun te vesut is lawa zin. Ne utew sikandin egkahandek.

²⁶Egketazin diyà te utew merusirem is ketiǥeyunan din. Ne ebinsulan sikandin wey is langun he nesamà diyà te ubpeey zin te hapuy he kenà etew is edretem duen.

²⁷Ibpezayag te langit is salè din ne edtistiǥus is tanà kuntra kandin.

²⁸Egkaanud te zalem is baley zin dutun te andew te kebpeǥezama kandin te Megbevayà te pauk din.

²⁹Iyan heeyan egkepeveyaan te lalung he etew he imbanglis te Megbevayà kandin.”