Yoobu 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Sofɑɑ Nɑɑmɑɡii u Yoobu sɔ̃ɔwɑ u nɛɛ,

²wee nɛn bwisikunu derɑ nɑ burisinɛ. Yen sɔ̃nɑ nɑ sɛnde n kɑ nun wisi.

³Nɑ wunɛn ɡerusibu nuɑ, bi bu mɑn duɑ too. Adɑmɑ nɛn bwisi koo de n nun wisi.

⁴Sɑɑ mìn di bɑ tɔnu tɑkɑ kuɑ,

⁵ɑ ǹ yɛ̃ mɑ kɔ̃sɑn kowon nɑsɑrɑ ku rɑ tɛ? Mɛyɑ mɑɑ win nuku dobu kun tɛɛmɔ.

⁶Bɑɑ ù n kpɑ̃ u wɔllu bɑbɑmɔ, ǹ kun mɛ u ɡuru winu dɛkɑmɔ,

⁷u koo kɑm kowɑ nɡe swɑɑ swĩi bi tɔnu u kuɑ. Be bɑ rɑɑ nùn wɑɑmɔ, bɑ koo nɛɛ, mɑnɑ u wɑ̃ɑ.

⁸Bɑ koo nùn duɑriwɑ nɡe dosu. U koo doonɑwɑ nɡe wɔ̃kurun kɑ̃siru.

⁹Be bɑ rɑɑ nùn wɑɑmɔ, bɑ ǹ mɑɑ nùn wɑsi. Mi u rɑɑ wɑ̃ɑ bɑ ǹ mɑɑ nùn wɑsi mi.

¹⁰Sɑ̃ɑrobu bɑ koo win bibu wɔri. Nɡe mɛyɑ u koo kɑ bu wesiɑ ye u rɑɑ bu mwɑɑri kɑ dɑm.

¹¹U dɑm mɔ, mɑ u sɑ̃ɑ nɡe ɑluwɑɑsi. Adɑmɑ u koo kɑ ye kpuro kpunɑwɑ sikirɔ.

¹²Kɔ̃sɑ rɑ n dowɑ win nɔɔ sɔɔ, kpɑ u n ye bɛri win yɑrɑɔ,

¹³yɑ n ɡirɑri sere win dɑroɔ. U ku rɑ n kĩ u ye deri.

¹⁴Adɑmɑ yɑ koo de win dĩɑnu nu sosiɑ win nukurɔ, kpɑ nu ɡɔsiɑ nɡe wɑɑ dɛ̃ɛ.

¹⁵Gɑbun dukiɑ ye u mwɛɛ, u koo ye siɑ. Gusunɔwɑ u koo ye yɑrɑ win nukurun di.

¹⁶Ye u koo nɔ, yɑ ko n sɑ̃ɑwɑ nɡe wɑɑ dɛ̃ɛ, kpɑ yu nùn ɡo.

¹⁷U kun tɑmɑɑ tim kɑ bom mu koo nùn kokuɑ nɡe nim torɑ.

¹⁸U koo win dukiɑ wesiɑ ye u wɑ mi. U ǹ mɑɑ yen ɑrufɑɑni dimɔ.

¹⁹Domi u sɑ̃ɑrobu dɑm dɔre. Mɑ u ben yɛnusu mwɛɛrɑ, u ǹ wiɡuu bɑnɛ.

²⁰Win bɔsɔnu ku rɑ yibu. Adɑmɑ bɑɑ ye u kĩru bo, u ǹ kpɛ̃ u ye tii yiiyɑ.

²¹Gɑ̃ɑnu sɑri ni u ǹ tii koosi. Adɑmɑ win dukiɑ yɑ ǹ tɛɛmɔ.

²²Bɑɑ ù n ye mɔ yɑ kpɑ̃, u ko n nuki sɑnkirewɑ. Sɑ̃ɑru tɑ koo nùn wɔriwɑ.

²³Wee sɑnɑm mɛ u win nukuru yibiɑmɔ, Gusunɔ u koo nùn wɔri kɑ mɔru bɑkɑ. Kpɑ u de sɛ̃ɛnu nu nùn wisi nɡe ɡurɑ.

²⁴Bɑɑ ù n tɑbu yɑ̃ɑ sisuɡinu dukɑ suurimɔ, bɑ koo nùn twee kɑ sii ɡɑndun tɛndu.

²⁵Bɑɑ ù n sɛ̃u teu wunɑ win wɑsin di, ǹ kun mɛ ù n yɑɑsɑ wukɑ win woo sɔndun di, ɡɔɔn bɛrum koo nùn surɑ.

²⁶Asɔrɔ yɑ koo win dukiɑ deemɑ. Kpɑ dɔ̃ɔ wi tɔnun bii kun sɔ̃ruɑ u nùn mwɑ, wi kɑ win yɑ̃nu.

²⁷Wɔllu tɑ koo win durum sɔ̃ɔsi, kpɑ tem mu nùn seesi.

²⁸Win dirun ɑrumɑni kpuro koo kɑm ko Yinni Gusunɔn mɔrun tɔ̃ru sɔɔ.

²⁹Yeniwɑ Yinni Gusunɔ u tɔn kɔ̃sobu yiiye. Yerɑ yɑ bu mɑrɑ siɑ.