1Cofar mu Naama àddu ne:
2Kon ma àddooti ndax jaaxle, ba xol jallaañoo.
3Dégg naa kàddug yedde gi nga may saagaa, waaye samam xel a ma déey sa tont.
4Xanaa xamoo lii? La dale ca cosaan, ba nit tegoo kaw suuf ba tey,
5xamoo ne ku bon, ag sarxolleem àggul fenn, te bànneexu yéefar yàggul?
6Bu màggoon ba tollook asamaan it, ba bopp ba àkki fa kawa kaw,
7day mujj seey fàww niy jonkanam; ña ko daa gis naa: «Ana mu?»
8Kenn du ko gisati, day réer ni gént, mbaa njeneeru guddi ju dàqu, wéy.
9Bët bu ko gisoon du ko tóllanti, dëkkuwaayam dootu ko séen,
10ay doomam ay dàmp néew-ji-doole yi, ba delloo seen alal.
11Mooy ànd ak dooley ndawam, tëri biir bàmmeel.
12Lu bon la daa tàqamtikoo, log ko, làq ca suufu làmmiñ wa,
13di ko siiramtal te du ko wacc, xanaa taf ko ca digg denqleñ ma.
14Waaye la muy lekk ay soppiku ca biiram, doon daŋaru ñàngóor ca butit ya.
15Moo dërëxoon alal, moo koy goqi, ca biiram la ko Yàlla di yuree.
16Ndeke tookey ñàngóor la muucu, mu rey ko ni mat-matu saamaan.
17Yàlla bumu niir wali dex ak waltani lem ak soow.
18Dina delloo lu mu amoon, du ko warax; te alal ju mu jula woon, du ko jariñoo.
19Moo dëggaate néew-ji-doole, dëddu ko; aakimoo kër jaambur te tabaxu ko.
20Biir ba du wéet, lu mu xemmem, du rëcc.
21Dara du rëcc ab kollam, moo tax xéewalam du toog.
22Fa mu regge lay jàqe, mépp musiba këppu ci kawam.
23Ba muy sol kollam la ko Yàlla di yónnee tàngooru sànjam, tawal ko ko lu fees déqam.
24Mu daw ngànnaayu weñ, fittu xànjar bëtt ko,
25jam ko ba fëll, cat la bëtt xol ba, di melax fa mu sare, tiitaangey ndee ne ko taral.
26Mboolem lëndëm a làqu di ko xaar, te sawara wu loxo jafalul a koy xoyom, lakkaale lu desoon ca xaymaam.
27Asamaan ay weer ñaawtéefam, suuf jóg, seedeel ko tuuma.
28Koomum këram day tukki, ne mes, keroog sànjum Yàlla ma.
29Lii moo di wàllu nit ku bon, fa Yàlla, muy cér bu ko Yàlla dogalal.
