Hiobe 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hiobe e iŋuc mume Namati ŋic Zofarizi dâŋ okacne kecʒiŋuc bâtikiecnewec:

²“O Hiobe, go dâŋ mutec maŋnane sâqoreme irec okacne bâtikie‐garepemurâ bunane bâruŋkekac.

³Go mu bawahac enârehuc dâŋ mukomec irec okacne gazapemurâ moc mi quŋkekopac.

⁴Juwicnaonecteaŋ mâreŋko ŋic fuarâ juwefumbiŋ dameŋ irec maŋnao ŋic sindaŋne jaŋe ʒeri bubiaŋ faio dameŋ ʒora boc mi jujumbieŋ i go mi manakic me?

⁶Jaŋe pepec‐jeŋiczi soka ʒorac erâ feku sambâŋ âke uaocmu mecne, erâ soka sanaŋ efeku qizec‐jeŋiczi karorac heuaocmu mecne,

⁷erâ sifu jaŋe jaŋacne ho iŋucne ʒaŋke omaec eniŋmu, ehame honec‐jopa jumbieŋ jaŋe ʒiŋuc mu wioc eniŋmu: ‘Jaŋe wena?’

⁸Jaŋe hosâc iŋucne omaeniŋmu, â guŋ manahuc mana ɋâɋârerâ manapene arictac eekac irec sâc arictac eniŋmu.

⁹Eme honec‐jopa jumbieŋ jaŋe mocwâc mi honec‐jopaniŋmu, â ŋec juc eeŋgopieŋ hae irecnec rârierâ siroweniŋmu.

¹⁰Ehame ŋokâfâc‐jeŋic jaŋe ine ŋic hapetac hone jauŋ ejareniŋmu, ehuc mamacfâc‐jeŋic jaŋe ŋic moneŋ mafa jowac rombiŋ i bârisie‐jareniŋmu.

¹¹Ŋic sindaŋne jaŋe socɋâri jaŋe iŋucne sanaŋkerâ tâpirihec eeŋgopieŋ, erâ sifu dameŋ mi ʒoraha ʒâŋeruŋko huniŋmu.

¹²“Ŋic sindaŋne e sâqocnere maname aŋacne eha hesoŋkehuc bajuekac, erâ aŋac‐ticne manahuc juocte sakareekac.

¹⁴Eme aŋac i hobu‐ticnao hurâ herisiehuc sopâc homare micopâ irec sâc eekac.

¹⁵E moneŋ mafa wiac fiuc rorâ ɋâckeekac i Anutuzi ecneme hobu‐ticnaonec mocwâc wefume maŋuekac.

¹⁶E wiac sâqocne nâkâcneekac i homare micopâ irec sâc, irec qotâzi ŋic kicjopame hâmoeŋgopieŋ irec sâc jaha hâmoekac.

¹⁷E wokemaŋ opâne me baŋac me susu mâririhec fuame hone aŋac ezacte aka hecnekicne.

¹⁸E mafa wiac hure hemârec eekac i jâoc roniŋmu, ehame nareŋ gareŋ ehuc moneŋ mafa bâfuawec i bubiaŋ manahuc babaju i wâc mi eocmu.

¹⁹E ŋic hapetac bâʒâic‐jopahuc hone qâoma ejarewec, â ŋic gâcne jaŋere fic wiac kâŋgâc jowac rowecte iŋuc hâcne fuacneocmu.

²⁰“Ŋic bu mâmâcnezi wiac sâcticne sirickeha ro qâzuc eekac, erâ sifu fosanaŋkeme ʒeri bubiaŋ mamana i moc mi eekac.

²¹E nânâ âmbâŋ naha tiwâne moc mi foekac, iŋuc eekacte moneŋ mafa sâko‐ticne omaeocmu.

²²E wiac sasawa mazuc mâriri focne‐bipieha ʒârâ hâriŋte tâpirizi qa sipiric ecneme arictac eocmu.

²³E wiac i me i nâzo murâ nâzejec, ehame Anutuzi kimbeŋ â aaric‐ticne hoŋkeme ere faio feocmu.

²⁴E aeŋzi ʒika bakicne i wisecneocte muha tepe motec aeŋ bâbâroŋzi bakicne izi kimârâŋkeocmu.

²⁵Ehuc bunao raʒirâ râpenao hemârâŋkeme, tepe motec micnao soc fome honerâ bipic tatara ecneocmu.

²⁶Ehame wiac sasawa râe qâzuc ewec i sipirickerâ omaeocmu, â ŋicmezi ʒoc mi ruqekicne izi e jahacne mecne â wiacfâcne mâmâc ʒâseŋ‐jopa‐fâreocmu.

²⁷Sambâŋzi kiŋticne bataniŋkeocmu, â mâreŋzi râsi ecnehuc dâŋticne mutaraocmu.

²⁸Anuture aariczi rumi iŋucne fisicnerâ moneŋ mafa wiac‐ticne qâurucke‐fâreocmu.

²⁹Ŋic sindaŋne jaŋe wiac iŋuc hâcne fua‐jareocte Anutuzi mupaŋkewec.”