Hiop 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mürin, Sofar ewe re Nama a pälüeni Hiop,

²“Ai osukosuk lon letipei a echimwaei pwe üpwe fos, pun üa fokun weires.

³Üa rongorong om kapasen aitengauaei, nge seni lon ai weweöch, üa silei mine üpwe pälüenuk won.

⁴Ka fokun silei mine a fis seni me lomlom, lon ewe fansoun, lupwen aramas ra kärän nom won fanüfan,

⁵pwe än ekewe aramasangau mweireir a chök fis lon fansoun mochomoch, nge än chokewe resap aleasochisi Kot pwapwa a fis lon eu chök otun.

⁶Inamwo are an eman lamalamtekia a tekiatä tori läng, nge möküran a tori ekewe kuchu,

⁷epwe chök morola usun kiten anan tori feilfeilachök. Chokewe mi küna i me mwan repwe apasa, ‘Ia ätewe a nom ie?’

⁸Epwe morukula usun chök eu tan, nge sisap chüen küna. Epwe süla usun chök künan eman lepwin.

⁹Mesen ätewe mi küna i esap chüen künasefäli, nge chon lenian resap chüen nenengeni.

¹⁰Nöün kewe repwe aliwinala mine a soläni seni ekewe chon wöüngau, ir repwe aliwinala wöün.

¹¹Inisin mi pöchökül me lom, nge iei epwe wiliti pwül moromor.

¹²Föföringau a arar me lon awan pwe a aopala fän chönawan,

¹³esap fokun mochen atowu seni lon awan, nge a chök amwöchü fän fongochun.

¹⁴Nge ewe mongö lon lukan a siwil ngeni maras, a wiliti poisonun serepenit me lon inisin.

¹⁵A oromala ekewe wöü o musäsinisefälirewu. Kot a atorowu seni lon lukan.

¹⁶Epwe atumuw poisonun ekewe serepenit, nge epwe mäla ren küwen eman serepenit.

¹⁷Esap manau ngeni an epwe küna ekewe chanpupu mi apuowu apüra seni föün olif, ika ekewe öüwö mi apuowu chönün chunen me milik.

¹⁸Epwe fangatä uän an angang, nge esap tongeni püsin aea, esap pwal tongeni pwapwaiti winnen an amömö.

¹⁹Pun a ariaföüü o tümwününgau ngeni ekewe chon wöüngau, a pwal angei fän pöchökül ekewe imw esap püsin aüetä.

²⁰Pokiten an mochenia esap ükütiu, esap tongeni amwöchü och seni mine a pwapwaiti.

²¹Wesin an mongö esap wor och lusun, iei mine wöün esap nonomola.

²²Lupwen a fokun wöümong, osupwang epwe tori, nge riaföü mi fokun pöchökül epwe feitiu won.

²³Lupwen a wes le aura lukan, Kot epwe tinato ren an song mi fokun chou, o fokun wichi.

²⁴Inamwo ika epwe süla seni eu pisekin maun seni mächä pwe esap küw, efoch föün esefich seni piras epwe fotolong lon inisin.

²⁵Ewe föün esefich a pwerewu me lükisökürün, mesan mi misimis a tikiwu seni marasan. Eniweniw a feitiu won.

²⁶Meinisin mine a ionifengeni a tala. Eu ekkei esor eman aramas a angeta epwe kenala i, epwe pwal kenala mine a lusun lon imwan imw mangaku.

²⁷Läng epwe pwärätä an föföringau, nge fanüfan epwe ütä o atipisi.

²⁸Aramas repwe angeala pisekin lon imwan, repwe uweala lon ewe ränin än Kot lingeringer.

²⁹Iei usun mine Kot epwe föri ngeni ewe aramasangau, iei usun mine Kot epwe awisa ngeni.”