Iyyooba Maxaafaa 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yaagin Temaana biittaappe yiida Elifaazi hagaadan yaagidi zaariis;

²“Aadhdhida eranchcha asi carkkodan ohettennabaa haasayii? Woikko arshsho bagga carkkuwaa ba uluwaa coo kunttii?

³Pattenna woikko maaddenna mootuwaa mootettii?

⁴Hegaa gidikko, neeni Xoossaassi yayyiyoogaa guuttadasa; haratikka Xoossaassi goinnennaadan diggaasa.

⁵Ne iitatettai ne haasayan erettees; ne cincca haasayai nena genttees.

⁶Ne bolli pirddiyai ne doonaappe attin, tana gidikke; ne inxxarssai ne bolli markkattees.

⁷“Koiro yelettida asi nenee? Woikko neeni dereti merettanaappe kase yelettadii?

⁸Neeni Xoossaa xuura yaa7aa tumu siyadii? Woikko aadhdhida eratettaa ne xalaalai eriyaabaa neeyyo milatii?

⁹Nuuni erennabaa neeni eriyoobi aibee? Nuuyyo gelennan aggidi, neeyyo gelidabai aibee?

¹⁰Ne aawaappe bairatiya asati, cimidi puulummida asati nu giddon de7oosona.

¹¹“Xoossai neeyyo immido minttettoinne nuuni neeyyo ashkketettan haasayido qaalai guutteeyye?

¹²Ne wozanai nena aissi wora efii? Ne aifeekka aissi xeelaa dereqqii?

¹³Yaatada neeni Xoossaa bolli hanqqettadasa; hegaa mala qaalaakka ne doonaappe kessadasa.

¹⁴Asi Xoossaa sinttan geeshsha gidanau danddayii? Woikko maccaasappe yelettida asi xillo gidanau danddayii?

¹⁵Be7a, Xoossai ba kiitanchchatunkka ammanettenna; harai atto salotikka a sinttan geeshsha gidokkona.

¹⁶SHin ha sheneyiyaanne tunida asi, nagaraakka haattaadan ganiya asi ubba iitaa darennee!

¹⁷“Iyyoobaa, ane siya! Taani neeyyo yootana; taani be7idobaa ubbaa neeyyo odana.

¹⁸Aadhdhida eranchcha asati bantta maizza aawatuppe demmido eratettaa genttennan tana tamaarissidosona.

¹⁹Ha biittai eta xalaalaassi imettiis; hara biittaa asaa timirttee eta giddon walahettibeenna.

²⁰“Asa huqqunnidi de7iya iita asi, ba de7o laitta ubban tuggi appe shaahettenna.

²¹Ubbaton daganttiya cenggurssai a haittan siyettees; i saro de7ais giishin, panggati a bolli yaana.

²²Xumaappe kessi ekkanaagaa i ammanenna; i bisuwau qaadettiis.

²³A ahai ankkuwau quma gidana; baayyo xuma gallassai matattidoogaa i erees.

²⁴Metoinne tuggai olau kiyida kawuwaadan a daganttana.

²⁵Aissi giikko, i ba kushiyaa Xoossaa bolli denttiis; Ubbaa Danddayiya Xoossaa bollikka xaliis.

²⁶Burzzuzzai burzzuzzai kiyi uttido ordde gonddalliyaa oiqqidi, Xoossaa bolli makkaliis.

²⁷“A som77oi modhdhido gishshau, a xeessaikka boborccido gishshau,

²⁸i laattidi de7iyo katamatikka olan laalettido gishshaunne i de7iyo keettatikka ooninne de7enna ona gidido gishshau,

²⁹i ba duretettan daro gam77enna; a aqoikka aara takkenna.

³⁰“Xumaappe i kessi ekkenna; a tasheta lacoi melissana; a ciishshaakka carkkoi pitti xaissana.

³¹Barkka bana cimmiiddi, hadaban ammanettoppo. Ammanettikko, i ekkanabaikka hadabaa.

³²Wodee gakkennan shulliyaanne meli simmidi, naa77antto aacanau danddayenna mittaa mala i gidana.

³³Teerennan wurccuwaara qoqqofettiya woiniyaa malanne ciishshai qoqqofettiyo wogaraa mala i gidana.

³⁴Xoossaassi yayyenna asatussi zaree xayana; mattaayiyan keexettida keettaakka tamai maana.

³⁵Eti metuwaa shahaaridi, iitabaa yeloosona; eta uluwankka cimoi kumi uttiis” yaagiis.