Yuba 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Teman kaana Elifasi mɔn yi falan tongo, a naxa,

²“Fekolonna lan a yi yabin ti naxan tɔnɔ mi na ba, naxan findixi fala fuun na?

³I lan i yi i xun mafala fala buntarene ra ba, naxanye tɔnɔ mi na?

⁴I Ala yɛɛragaxun kalama muxune yi, i e Ala maxandi feene xunna kalama.

⁵I i hakɛne nan ma fe falama. Fala ɲaxine nan i dɛ.

⁶N tan mi a ra, i fala xuiin nan i yalagixi. I dɛɛn nan i seren na.

⁷I singe nan barixi adamadiine birin yɛɛ ra ba? I singe nan daxi benun geyane xa da ba?

⁸I Ala wundo falane ramɛ nɛn ba? I tan nan keden fe kolon ba?

⁹I nanse kolon, nxu mi naxan kolon? I nanse famuma, nxu mi naxan famuma?

¹⁰Xun sɛxɛ fixɛne na, fonne nxu yɛ, naxanye fori i fafe xa.

¹¹Ala i ralimaniyama falan naxanye ra, i makoon mi ne ma ba, nxu fala faɲin naxanye tima?

¹²Nanfera i bɔɲɛn tema? Nanfera i yɛɛn xun sinma,

¹³i niin nafɔrɔ Ala xili ma, i na fala sifane ti?

¹⁴Nanse adamadiin na, a yi a yɛtɛ yatɛ sariɲanden na? Naxan minixi ɲaxanli, na findɛ tinxinden na ba?

¹⁵Hali a malekane, Ala mi lannayaan saxi ne yi. Hali kore xɔnna, a mi sariɲan a yɛɛ ra yi.

¹⁶A xa lannayaan sa muxun tan yi di nayi, naxan ɲaxu, naxan yanfan tima, tinxintareyaan nafan naxan ma alo igen min daxina?”

¹⁷“N xa a yɛba i xa, i tuli mati. N xa a yɛba n naxan toxi,

¹⁸fekolonne naxan falaxi, e nun e benbane, naxanye mi sese luxunxi e ma,

¹⁹Ala yamanan so naxanye gbansan yii, xɔɲɛ yo munma yi so naxanye yɛ.”

²⁰“Ɲaxuden luma kɔntɔfinla nin a siimayaan birin yi, ɲaxankata tiina waxatin yatɛxin na a ra.

²¹A wurundun xui magaxuxine mɛma, bɔɲɛ xunbeli waxatini, halagin yi fa a tan ma.

²²A mi laxi a mini feen na sɔnɔn dimini, a faxama yɛngɛn nin.

²³A donseen fenma, koni a sɔtɛ minɛn? A kolon a faxan lɔxɔna a mamɛma.

²⁴Kɔntɔfili feene nun kuisan feene a magaxuma nɛn, e wuyaxi yi fa a xili ma alo mangana ganla nan sigan yɛngɛni.

²⁵Ne feene birin a sɔtɔma nɛn bayo a bata susu Ala ra, a murutɛ Ala Sɛnbɛ Kanna xili ma.

²⁶A keli nɛn Ala xili ma a tengbesenyani, a yɛ masansan wure lefa gbeen tixi a yɛɛ ma.

²⁷A yɛtagin tuyanxi, a gbingin gbo,

²⁸koni a luma nɛn taa rabeɲinxine yi, banxi kui genle yi, naxanye kalamatɔ a ra.

²⁹Na kanna mi fa hɛrin sɔtɔma, a nafunla mi sabatima, a fɔxɔn mi fa luma bɔxɔn fari sɔnɔn.

³⁰A mi tangama sayaan ma, a luma nɛn alo tɛɛn wudi dungin naxan ganma, Ala dɛ foyen yi a xali wulani.”

³¹“A yigin saxi fuyanten feene nin, koni a yɛtɛ nan yanfanma, bayo fuyantenyaan nan findima a saranna ra.

³²Na kamalima nɛn benun a xa faxa, alo wudin naxan mi fa a maɲingima.

³³A luxi nɛn alo manpa binla naxan a bogine rayolonma e mɔn xinde, hanma alo oliwi binla naxan fugeye yolonma a ra.”

³⁴“Na ligama nɛn bayo dii mi barima Ala kolontarene denbayane yi, yanfan banxin naxanye kui, ne findima tɛɛn balon nan na.

³⁵Sɔxɔlɛ feene e yi, na yi findi fe ɲaxine ra, e yanfani tɔn e bɔɲɛni.”