1Zama se Elipazi na tie pa vasileana nomana pa Temani,
2“Be na tie gilagilana si goi si lopu kote olaṉa ni sari zinama kokobadi; agoi si siṉi igo mo na givusu.
3Na tie gilagilana si lopu kote zama hoboro gugua agoi, babe lavelave pule nia koari na zinama loke ginuadi.
4Be ta luli si agoi, si loke tie kote pamaṉa nia sa Tamasa, meke loke tie si kote varavara la koa Sa.
5Sa mua sinea si bakala nana koari na mua zinama, podekia goi pude tome koari na sinekesekeidi ri na zinama.
6Arau lopu kilu zutu igo si agoi, sari berumu telemu na zutu igo.
7Vea, agoi sa tie kekenu pude podo? Ele koa mua tu totoso taveti Tamasa sari na toqere?
8Vea, avosi mua sari na vivinei te Tamasa? Meke sari ginilagilana si mua eke mo?
9Na sa si tumae nia goi, sapu gami lopu tumae nia? Na sa si gilania goi, sapu gami lopu gilania?
10Gami si vagi ginilagilana koari na tie koadi meke na tie ele keodi, ari tie sapu kenudi hola nia sa tamamu.
11Sari na vina manoto te Tamasa si zama atu ni gami, vea ke koromu ni tu? Zama ponia gami si Asa, zinama sapu bule meke ṉoṉo.
12Na sa si turaṉa va seu ia sa mua binalabala, ke doṉo va bubugoro mae gami goi?
13Na vegua ke bugoro nia goi sa Tamasa, meke zama lani goi soku zinama sapu lopu leadi?
14Vea, boka koa via sa tie? Boka sa tie pude koa toṉoto gugua sa Tamasa?
15Ura, sari Nana mateana ba lopu raṉei mo sa Tamasa; arini ba lopu via mo pa Nana dinoṉo.
16Napoa gita sa kinaleana, guana kolo. Uve, kaleada si gita meke loke laeda.
17Avoso mae, maqu va bakalia koa goi, maqu tozi nigo sapu gilania rau.
18Saripu gilagilana ele tozi nau sari hinokara, saripu ta totozi ni rini koari na tamadia, meke loketoṉa si tomea rini.
19Loke tie karovodi si koa pa dia popoa; loke votiki tie si koa pude turaṉa va seu i koe Tamasa.
20Sari tie kaleadi si kote koa ta sigiti doduruna sa dia tinoa, doduru vuaheni pa dia tinoa si kote kamoi tinasuna si arini.
21Mamalaiṉi variva holoqorudi si gagaemana pa taliṉadi; balabala sapu koa valeana si arini, ba raza i mo rina tie hikohiko.
22Lopu rovea arini sapu kote boka govete nia rini sa hinuporo, ura, gilania dia sapu korapa aqani rini pude seke va matei.
23Sari kurukuru gani tomate si korapa aqa pude gani sari tomatedi; gilania dia sapu sa rane tasunana si tata kamo.
24Sa rane huporona asa si matagutu hola nia rini, tarazuzu si arini, guana keke baṉara ṉiṉirana si namanama pude la rapata i.
25Asa sa vina betodi rina tie pu nadoro lani limadia koasa Tamasa pu tagoi sari doduru ṉiniraṉira, arini pu hiva raza ia meke kana ia sa Tamasa.
26Vahesi puleni sari tie arini meke va kanakana la koasa Tamasa, taṉini sage ni rini dia lave, korodia matagutu meke haqala la pude raza ia sa Tamasa.
28Ba sari na tie arini si kote koa koari na popoa lavata, saripu lopu sana kote ta huara pa vinaripera, sari na vetu pu ta veko palaedi si kote koa i rini.
29Kote kokoi mo sari dia tinagotago, meke doduru pu tagoi rini si lopu kote koa hola; sari dia likakalae ba kote murimuri palae.
30Lopu kaqu boka govete nia rini sa hinuporo pa minate. Kote guana huda si arini, sapu ta sulu lelaṉadi pa nika, meke ta givusu palae pa siniṉo te Tamasa.
31Pana pupuhu sisigiti si arini si kote raṉea rini sa kinaleana, meke sa kinaleana si kote na dia pinia.
32Sipu lopu ele kamo sari dia totoso si kote mate vata kenue si arini, kote harahara guana lelaṉa huda, meke lopu kaqu buma pule.
33Guana huda vaeni sapu udo va kenue vuana, sipu lopu ele komiha, guana huda olive sapu hoqa havorona ke lopu boka vua.
34Kote tige saripu lopu vahesia sa Tamasa; na nika kote sului sari dia vetu saripu ta kuri pa poata tinabara golomo.
35Hire sari na tie saripu balabala hata tinasuna meke tavete va kaleana, sari bulodi si siṉi i na binalabala sekesekei.”
