Job 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Elifas brom det taun gulum Teman bin tok igin,

²“Job, if yu bina abum gudbala main, yu bina stap toktokbat siliwei.

⁴Yubin tok tumatj na. Maitbi yu meigim najalot pipul gibit bekboun langa God na, en meigim olabat wanwanbat en nomo prei langa im.

⁵Yu jinggabat nogudbalawei en im meigim yu tok trikibalawei du.

⁶Mi nomo iya blanga jadjim yu, bat ola wed weya yubin tok meigim yu jidan gilti.

⁷“Yu reken yu na det feswan men hubin bon? Yu reken yubin jidan iya bifo detlot hil bin jidan deya?

⁸Yu reken yubin irrim God tok blanga meigim ebrijing? Yu reken oni yu sabi det wei blanga God?

⁹Yu reken yu sabi en andasten ebrijing wen melabat nomo sabi?

¹⁰Melabat garram klebabala wed weya melabat gin dalim yu. Detlot wed bin jidan brom longtaim bifo ola dedimob.

¹¹“Wal God bin dalim yu im laigim yu detmatj en im fil sori blanga yu. Yu reken tharran im naf blanga yu?

¹²Bat det filing blanga yu im go difrinwei, en im meigim yu luk brabli wailwan.

¹³Yu oldei pudum bleim langa God en yu larram detlot wed kamat brom yu ronwan mawus.

¹⁴Nomo eni pipul jidan brabli klinbala en raitwei.

¹⁵Detlot einjulmob du, olabat nomo klinbala langa God. Wal if God nomo trastim im einjulmob,

¹⁶wanim yu reken garra hepin langa wi? Wi oldei dumbat brabli nogudbala ting, en wi oldei lukabat blanga mowa nogudbala ting.

¹⁷“Job yu irrim langa mi na. Ai garra shoum yu wanim aibin lenim.

¹⁸Ai sabi ol detlot klebawan wed brom wi grengrenfathamob en ola klebawan hubin jidan longtaim.

¹⁹Detlot pipul hubin abum klebabala main bin jidan bos blanga ol detlot kantri du. Nomo najalot pipul bin titjimbat olabat.

²⁰“Ol detlot nogudbala pipul hu oldei faitfaitbat garra abum loda trabul langa olabat laif.

²¹Wen olabat abum gudbala taim olabat gin stil irrim det nogudwan ting jinginatbat insaid langa olabat irriwol.

²²Ol detlot nogudbala pipul kaan neba kamat brom det dakbala, dumaji sambodi garra kilim olabat ded.

²³Olabat sabi det dakbala im kaminap, en detlot bigwan bard gulum boltja oldei weidabat blanga dagat detlot dedwan bodi.

²⁴Olabat brabli bradinbala wulijim det king hu brabli bradin wen im go blanga fait langa im enamimob.

²⁵Lagijat na, dumaji olabat oldei gibit bekboun langa God det brabli haibalawan,

²⁶en olabat bin faitfait langa im.

²⁷Olabat maitbi brabli ritjwan en brabli fetwan,

²⁸bat olabat garra ol jidan langa det rabishwan taun nomo garram eni pipul.

²⁹Ola enijing blanga olabat garra ol binijap.

³⁰Olabat kaan neba gowei brom det dakbala pleis. Olabat jis laik det tri wen det faiya bin barnimap en det win bin blowimwei detlot purdiflawa.

³¹Olabat bin oldei trastimbat nogudbala ting. Wal olabat garra jidanbat nogudbala wulijim det pamtri weya go nogudbala wen im jidanbat nomo garram eni lif.

³³En olabat garra jidanbat wulijim det greiptri weya detlot rauwan frut daga oldei buldan langa graun, en laik det olibtri weya oldei lujimbat im purdiflawa.

³⁴Wal detlot pipul hu nomo bilib langa God en detlot pipul hu oldei gridi blanga olkain ting, olabat kemp garra ol barnbarn,

³⁵dumaji olabat na bin meigim detlot trabul en laiyinbala wed.” Lagijat na Elifas bin tok.