Ayuba 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elifasi Temanka naxa a fala,

²«Lɔnnila xa yaabi nɔma maniyade foye ra? A yɛtɛ igboma na nan na?

³A nɔma a xun mafalade wɔyɛnyi fufafu ra? A nɔma masenyi falade naxan tide mu na?

⁴I na binyɛ bafe Ala ma, i na limaniya bafe mixie yi ra Ala batufe ra.

⁵I xa fe ɲaaxi nan a niyafe i xa wɔyɛn na ki. I wama mixie madaxufe i dɛ ra.

⁶I dɛ yati nan findixi seede ra i xa fe ɲaaxie ma. N tan mu a ra.»

⁷«Adama singe i tan nan na? I singe daa geyae bɛ?

⁸I Ala xa gundo ramɛ nɛ, alako i xa lɔnni sɔtɔ i yɛtɛ kan bɛ?

⁹I munse kolon muxu tan mu naxan kolon? I fahaamui mundun sɔtɔxi muxu tan mu naxan sɔtɔxi?

¹⁰Forie na muxu ya ma naxee fori i baba bɛ.

¹¹I mu limaniya sɔtɔ Ala xa masenyie kui, muxu naxee fala i bɛ marafanyi ra?»

¹²«I bɔɲɛ texi munfe ra, han i ya bara gbeeli a i,

¹³i dɛ nu fa wɔyɛnyie fala xɔnɛ kui Ala bɛ?

¹⁴Adamadi sɛniyɛn? Ginɛ bari di tinxin?

¹⁵Xa Ala mu lama a xa sɛniyɛntɔɛe ra, xa koore yati mu sɛniyɛn Ala ya i,

¹⁶adamadi go, naxan bara kana, naxan fe ɲaaxi rabama tɛmui birin?»

¹⁷«I tuli mati n na, n xa na tagi raba i bɛ. N fe naxan toxi, n xa na fala i bɛ,

¹⁸lɔnnilae naxan masenxi, e naxan sɔtɔ e babae ra e mu a nɔxun.

¹⁹Ala bɔxi fixi e tan nan ma, xɔɲɛ gbɛtɛ yo mu nu na sinden.

²⁰Mixi ɲaaxi tɔɔrɔma nɛ a xa simaya birin kui, kɔnti saxi a xa simaya ma.

²¹A halaki fe mɛma, muɲɛtie baganma a ma, e a xa bɔɲɛsa kana.

²²A a kolon a mu kisima, santidɛgɛma na a mamɛfe.

²³A a lintanma balo fende, a a kolon a mu ratangama dimi ma.

²⁴Tɔɔrɛ nun kɔntɔfili bara a magaaxu, e gere tima alɔ mangɛ nun a xa sɔɔrie,

²⁵barima a bara a yɛtɛ igbo Ala ma, a bara suusa Ala Sɛnbɛ Kanyi ra.

²⁶A bara suusa Ala gerede a xa wure lefae bun ma.

²⁷A bara xungbo han a furi xalɛ bara dɔxɔ,

²⁸kɔnɔ a fama sabatide taa kanaxie nan kui, naxee na birafe, mixie mu na dɛnnaxɛ.

²⁹A xa naafuli ɲɔnma nɛ, a xa bannaya kana. Barakɛ mu luma a xa se sɔtɔɛ ma sɔnɔn.

³⁰A mu nɔma kelide dimi kui. A bɔnsɔɛ fama gande, a sɔntɔ Ala kɛrɛ foye ra.»

³¹«Xa a xaxili tima fe fufafu ra, a fe fufafu nan sɔtɔma.

³²Beenun a xa simaya xa kamali, a fama ɲaxankatɛ sɔtɔde.

³³A luma alɔ sansi bogi naxee bama e xinde ra, alɔ sansi fuge naxee birama.

³⁴Tinxintare xa denbaya mu gboma, mixi naxee kɔbiri rasuxuma tinxintareya kui, e xa banxie ganma nɛ tɛ ra.

³⁵Fe ɲaaxi maɲɔxunfe findima tɔɔrɛ nan na. Na maɲɔxunyi fama a kanyi yanfade.»