Hiobe 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme Temaŋŋic Elifaʒi e Hiobe dâŋ okacne kecʒiŋuc bâtikiecnewec:

²“O Hiobe, go dâŋ mukomec i racne â fârimâc sasawa.

³Manakic, go dâŋ wosekomec i ŋic maŋɋârâŋheczi mi mumune, erâ juju bapa‐ticne i dâŋ racne keciŋucnezi wâc mi dopeckeocmu.

⁴Go ŋic jaŋe Anutu araŋ bacnehuc juhapie aka hejarekomec, ehuc numucnehapie wâc hecke‐jarekomec.

⁵Go maŋgezi mumu hehec egareha dâŋ keci mukomec, ehuc burecŋic jaŋere dâŋ hawari ehuc fuŋnege hesoŋkekic.

⁶Irec noni mâcne, go gahacne dâŋzi dâŋgieo râecguhuc mugâpâre‐gareocmu.

⁷“Goki fuŋkerâ mâreŋko jumeŋ me? Me go fuarâ juhaŋtec Anutuzi tiki bâfua‐fârewec me?

⁸Me Anutuzi wiac mana biric ewec i goki moc hone manac emeŋ me? Me maŋɋârâŋhec juju i go buc jukic me?

⁹Manakic, goki wiac manakomec i nâŋe manaeŋgopeneŋ wâc, erâ go mamana tara fogarekac sâc ijaha nâŋe wâc fonârekac.

¹⁰Maŋɋârâŋ qazu‐nârekicne i gore mamaczi mi fuarâ juha ŋic jaŋɋâŋhec jumbiŋ jaŋe hâcne nâzâ qazuc epie manambeŋ.

¹¹Anutuzi mu bâmiriŋ egarezo mume wemocte qikiŋ nekomec? Â dâŋ wama ruaine irec manatec wemocte fâri tâmiric ekac?

¹²Go wemocte buge taŋtaŋ âeckeha ʒâŋe bâbâroŋ honec‐nâpokomec?

¹³Erâ wemocte Anutu aaric manacnehuc dâŋ keciŋucne bocjaha wose rakomec?

¹⁴Ŋic ŋokackonec fuakicnezi jâmbomac bahac fâsâc moc juocmu me? Me Anuture maio kiŋ tâmiric moc domaocmu me?

¹⁵Manakic, Anutu e aŋelofâc‐ticne jaŋerao mi fohoreweekac erâ sambâŋte ŋecjucfâc jaŋere wâc maname mi sâcke‐hâmoekac.

¹⁶Ehame ŋic sindaŋne â mamakâcne e wiac hehesicne i nânâ opâ iŋucne gapec tâmiric nâ bac eekaczi wemocko bahac fâsâc erâ kiŋ tâmiric juocmu.

¹⁷“O Hiobe, go manahaŋtec dâŋ moc gaza mutâc epe, ehuc wiac hone manac epo irec binaŋ bagarepe.

¹⁸Ŋic maŋɋârâŋhec jaŋe mamacfâc‐jeŋic jaŋeraonec dâŋ fârine manambiŋ i moc mi hesoŋkehuc mu qazuc enarembiŋ.

¹⁹Jaŋe mâreŋ‐jeŋicko ŋic jabane moc mi jumbiŋte mozi moc eatuc‐jopame Anutu râpeckenʒapiŋ.

²⁰Ŋic sindaŋnezi ŋic âgofâc‐ticne bâʒâic‐jopaocmu e mâreŋko jufeocmu sâc hâhâwic bajuocmu.

²¹Wiac hâhâwicnere fânâŋzi hazec‐ticnao huocmu, erâ wama faio sâcne mac jukopac muhame ʒikaŋiczi fisicneocmu.

²²E ʒikare biŋe ekopac muhuc hâmoc wisecneocte maname quŋkeocmu.

²³E nânâ wena moc bâfuape muhuc koŋkoŋkehuc juekac, ehuc ʒiŋuc manapaŋkeekac: No sisipiricte biŋe hâcne.

²⁴Ehuc ŋicwofuŋ moczi ʒikao raocte ʒawiehuc juekac, irec sâc sisipiriczi nore woŋec foha hâhâwic faio hume serereŋ juekopac.

²⁵Ŋic moc e Anutu bapafâre râsi ecnehuc maŋbâiŋ ecneocmu e wiac iŋuc hâcne fuacneocmu.

²⁶Ŋic iŋucnezi pepec ehuc maro‐ticne he bâfeŋnerâ kiwaehuc Anutuhec juju gie baocte ʒoɋac eekac.

²⁷E ʒâŋe mai‐ticnao wokemaŋ ruaekac erâ nânâ âmbâŋ nâhuc biuc wokemaŋ sâkohec eekac.

²⁸Ŋic eki hâcne hae ima bakicne i ro rauc ewec, â fic ʒocte biŋe qahuc behekicne ira ŋec juc ewec, irec ine fic hae i ʒikazi imackeocmu.

²⁹Ŋic iŋucnezi mafa mâriri sâkohec mi eocmu, erâ wiac focnekac i fofo sanaŋ fohuc fua sawec wâc mi eocmu.

³⁰E dapâc wisecne‐bipieocmu, ehuc jâc moc ʒoczi ʒahuc tieŋ taeŋne ʒâtâmireekac, me mâŋâŋzi âri‐ticne ficne sueme ratâmireekac irec sâc eocmu.

³¹E mutuc erâ wiac sisirowenao roweckeocmu ine irec fârine wiac sisirowene jaha fuacneocmu.

³²Ehame dameŋ‐ticne mi taraha jâczi ururuckerâ mocwâc mi fieekac irec sâc jaha eocmu.

³³E waiŋ qaŋeŋnezi hândâŋ‐ticne woze qeuc mi ehuc mâtâckeekac, me oliwa jâczi ârickerâ qasawa eekac irec sâc.

³⁴Ŋic sindaŋne jaŋe ɋâric tâmiric juku omaeniŋmu â fic hae‐jeŋic hotâ moneŋzi bakicne i ʒoczi ʒâseŋke‐fâreocmu.

³⁵Ŋic iŋucne jaŋe sisipiric fuaocte mamana gie bahuc hehesic bâfuaeŋgopieŋ, ehame eeatuczi maŋjeŋic fusucmarâ foekac.”