Job 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eliphaz tangada mai Teman ga helekai boloo:

²“Job, au helekai la deai ono hadinga ai.

³Deai dahi dangada kabemee e mee di helehelekai be au helekai aanaa e leelee iei goe ai, be e duuli ia gi nia helekai ala e de iloo ono hadinga.

⁴Maa nei bolo e hai hua be au helekai aanaa, malaa deai tangada e madagu i God ai, gei deai tangada e dalodalo gi God ai.

⁵Do mouli huaidu le e hagamodongoohia go au helekai. Goe e hagamada bolo goe e gahu goe gi au helekai kabemee.

⁶Ma hagalee ko au dela e haga huaidu goe, go koe hua dela e bida haga huaidu goe i au helekai ala e leelee iei goe.

⁷“Goe e hagabau bolo ma kooe dela ne haanau matagidagi i henuailala? Goe nogo i golo i di madagoaa God dela ne haganoho nia gonduu?

⁸Goe gu hagalongo gi di bilaan a God dela ne haganoho? Go kooe hua modogoe dela e hai mee gi di iloo mee o nia daangada?

⁹Dahi mee igolo ai bolo kooe hua e iloo gei gimaadou e de iloo.

¹⁰Gimaadou ne kabe madau iloo mai baahi digau mmaadua, go digau ala ne haanau mai i mua do damana.

¹¹“God e hiihai bolo e hagamanawa lamalia goe, gei goe e aha dela e dagalili? Gimaadou e helekai i di ingoo o God i di lee humalia, mo di noho baba.

¹²Gei goe gu ngalua do manawa ga daumada hagawelewele mai gi gimaadou.

¹³Goe gu hagawelewele gi God, gu helekai huaidu i Mee.

¹⁴“Ma iai tangada i golo bolo ia e madammaa? Ma iai tangada i golo bolo ia e donu i mua o God?

¹⁵God hagalee hagadonu hogi ana gau di langi, idimaa digaula hagalee e madammaa i ono mua.

¹⁶Gei nia daangada e inu nia huaidu gadoo be nia wai. Uaa, nia daangada gu huaidu, digaula la digau balumee hua.

¹⁷“Deenei laa, Job, hagalongo mai, au ga helekai i agu mee ala e iloo.

¹⁸Digau kabemee gu aago mai au gi nia mee ala e donu, ala ne kabe mai i baahi nadau damana ala i mua, digaula digi hagammuni dahi mee gi daha mo au.

¹⁹Deai tangada tuadimee ne noho i baahi digaula ai, gei deai tangada i digaula ne dagi digaula gi daha mo God ai.

²⁰“Tangada huaidu dela e hagaduadua nia daangada, ga hagaduadua i di waalooloo o dono mouli.

²¹Nia hagadilinga lee hagamadagudagu dangada e ulu gi lodo dono dalinga. Digau gaiaa ga heebagi gi mee i dono madagoaa e mamaanadu bolo ia guu noho i di aumaalia.

²²Deai dono hagadagadagagee ai bolo ia e mee di doo gi daha mo di bouli, idimaa tulumanu dauwa i golo e talitali belee daaligi a mee.

²³Nia manu mamaangi luuli gai dangada i lodo di anggowaa, e noho talitali belee gai tuaidina o maa.

²⁴Di haingadaa guu gahu a mee gadoo be di king maaloo mogobuna, e talitali belee hai tauwa.

²⁵“Deenei la go di hui o digau ala ma gaa llomi nadau lima ang gi God, belee heebagi ang gi God Mogobuna.

²⁶Tangada deelaa le e hagamuamua, e hai baahi, gei e de hagalongo, gei e maaloo di duu e daahi dana mee abaaba ia, e hana e heebagi ang gi God.

²⁸“Deenei la go tangada dela ne haga magedaa nia waahale, gaa kae nia hale nia daangada ne llele gi daha. Malaa, go tauwa dela e oho nia waahale mono hale aalaa.

²⁹Mee hagalee waalooloo ono maluagina, ono goloo e limalima hua di odi gi daha e hai gadoo be dono ada i hongo di gelegele ma ga hagalee.

³⁰Mee hagalee tanga gi daha mo di bouli, mee e hai gadoo be di laagau dela ma gaa wele ono manga gei di madangi gaa ili gi daha ono huwa.

³¹Maa mee ga boiboi ga hagadonu hua di huaidu, malaa dono hui la dela hua go di huaidu.

³²I mua dono madagoaa ma ga dau mai, mee ga maangoo gadoo be di manga laagau dela gu maangoo gu hagalee e matili aga labelaa.

³³E hai be di laagau waini dela e monnono ono golee modo, be di laagau olib dela ono huwa gu malingi gi lala.

³⁴Digau nadau god ai la ga hagalee nadau hagadili. Di ahi gaa dudu nia hale o digau ala ne kumi nadau hui hala mai i nadau ngalua hala.

³⁵Aanei la nnagadilinga daangada ala e haganohonoho nadau hai huaidu, nia manawa digaula le e honu i nia huaidu i nia madagoaa huogodoo.”