Job 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Neehè ku wey nezineg ku is langun he migkaǥi niw, wey nesavut ku heini.

²Ke hengkey is netuenan niw ne netuenan ku zaan; kenè kew lavew kediey.

³Piru kenà a ebpekidlalis keniyu mehitenged te kasu ku, kekenà, diyà a ebpekidlalis te Megbevayà he Mekeǥeǥehem.

⁴Su ebpenigudu kew he ebawì kedì te ketetarù niw. Pudu kew iring te duktur he wazè din pulus.

⁵Deyzey pa ke pudu kew ebpereremek. Iyan heeyan kineupiyahan he ereg he ebeelan niw.

⁶“Guntaan, pemineǥa niw is ketezengan ku.

⁷Edlevanan niw ve is Megbevayà pinaaǥi te kedtarùtarù niw?

⁸Edlevanan niw ve sikandin wey edipinsahan niw is kasu zin?

⁹Emun edsusiyen kew te Megbevayà, duen be vuwa meupiya he egkeehè din diyà te keniyu? Kenè niw isipa he egkelimbungan niw sikandin iring te kegkelimbungi niw te menge etew.

¹⁰Kenà duwazuwa he edewayen kew te Megbevayà minsan pa te edlevanan niw sikandin.

¹¹Wazè kew ve mahandek te ǥehem din?

¹²Henduen dà te avu is menge erubasa niw su wazè din pulus; wey henduen dà te ziniyun he tanà is menge ketezengan niw su melemu heini he eberawen.

¹³“Kenè kew kaǥi emun egkaǥi a, ne vey-ani ad keniyu minsan hengkey is egkehitavù kedì.

¹⁴Su ibpedseraken ku en is untung ku.

¹⁵Siguradu he edhimetayan a te Megbevayà; wazè ku en meupiya he egkeperateng. Piru edipinsahan ku ǥihapun is keugelingen ku ziyà te etuvangan din.

¹⁶Su kela ke pinaaǥi kayi egkelibri a, su is etew he kenà edsunud te Megbevayà kenà ebpekeuvey ziyà te etuvangan din.

¹⁷“Purungi niw pemineǥa is ebpengeǥiyen ku.

¹⁸Guntaan te andam ad he edipinsa te keugelingen ku, netuenan ku he iyan hukum kedì is wazè ku salà.

¹⁹Ke zuen ebpekesumbung kedì he nekesalà a, ebpereremek ad taman te kebpatey ku.

²⁰“He Megbevayà, kenà a ed-eles kenikew emun ibeǥey nu kediey heini is dezuwa he ebuyuen ku:

²¹engkezi ad kenikew te ebpaantus, wey kenà ad kenikew pelihendeka te mekahandekhandek he menge vaal nu kayi te kedì.

²²Ne ǥuntaan, kaǥi ka kayi te kediey ne edtevaken ku sikew, etawa iyan a egkaǥi ne tevaka a kenikew.

²³Keǥiyi a kenikew ke hengkey he salà is nehimu ku. Ipeehè nu kedì is menge kerepasan ku wey menge salè ku.

²⁴Maan is edlikayan a kenikew, wey ed-isipen a kenikew he kuntada nu?

²⁵Maan is ebpelihendeken a wey edel-asen a kenikew is iring dà te reǥami etawa zahun he idlayap te keramag?

²⁶Insurat nu is mesakit he sumbung nu kediey, ne ebpeveyazan nu kediey is menge salà he neveelan ku zengan te vetan-en e pa.

²⁷Henduen be te egkedinahan nu is menge paa ku. Ebenteyanan nu is kada langkad ku, wey edsunuzen nu is menge nayè ku.

²⁸Umbe, iring a te repuk he egkeredak en wey visti he egketketen te zezeizey he keranapranap.”