Yoobu 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wee nɛn nɔni yi ye kpuro wɑ, nɛn swɑsu su mɑɑ ye kpuro nuɑ, mɑ nɑ ye lɑɑkɑri kuɑ.

²Ye i yɛ̃, yerɑ nɛn tii nɑ mɑɑ yɛ̃. I ǹ mɑn bwisi kere.

³Adɑmɑ Yinni Gusunɔ Dɑm kpuroɡiiwɑ nɑ kĩ n ɡɑri sɔ̃. Wiyɑ kon weeweenu koosi.

⁴Domi bɛɛ, weesɑ i rɑ n sekumɔ. I sɑ̃ɑwɑ tim nɛmɔ weesuɡibu.

⁵N dɑɑ burɑm bo i n mɑɑri, kpɑ bu bɛɛ ɡɑrisi nɡe bwisiɡibu.

⁶Tɛ̃, i nɛn weeweenu swɑɑ dɑkio, kpɑ i nɔ ye nɑ ɡerumɔ.

⁷I tɑmɑɑ i ko i Gusunɔn biru yɔ̃rɑ kɑ weesu? I ko i nùn mɔru bɑrɑ kɑ ɡɑri weesuɡii?

⁸Bɛɛyɑ i ko i kɑ nùn yinɑ? Bɛɛyɑ i ko i nùn weeweenu kuɑ?

⁹Ù n bɛɛ wɛ̃ɛrɑ i ko i nùn wɛ̃re? I ko i nùn nɔni wɔ̃ke nɡe tɔnu?

¹⁰Bɑɑ ì n win biru yɔ̃rɑ ɑsiri sɔɔ, kɑ mɛ, u koo bɛɛ tɑɑrɛ wɛ̃.

¹¹Win kpɑ̃ɑru tɑ ǹ bɛɛ bɛrum mɔ̀? I ǹ nɑndɑmɔ win sɔ̃?

¹²Bɛɛn ɡɑri sɑɑrinu nu sɑ̃ɑwɑ nɡe torom. Ye i ɡerumɔ yɑ ǹ dɑm mɔ nɡe weke te bɑ kɑ sɔndu mɔmɑ.

¹³I mɑrio, kpɑ i de n ɡɑri ɡere, kpɑ n mɑn deemɑ ye n ko n mɑn deemɑ.

¹⁴Wee nɑ sɔɔru kpɑ, bɑɑ nɑ̀ n kon nɛn wɑ̃ɑru biɑn nɑ.

¹⁵Gusunɔ ù n kĩ, u mɑn ɡoowo. Kɑ mɛ, wiyɑ nɑ nɑɑnɛ sɑ̃ɑ. Kon kɑ tii yinɑ win wuswɑɑɔ.

¹⁶Yɑ koo kpĩ yu kɑ mɑn fɑɑbɑ nɑɑwɑ. Domi tɔn kɔ̃so kun kpɛ̃ u terɑ win wuswɑɑɔ.

¹⁷I swɑɑ dɑkio i nɛn ɡɑri nɔ. I swɑɑ tem kpĩiyɔ i nɔ ye kon ɡere.

¹⁸Wee nɑ sɔɔru kpɑ n kɑ nɛn ɡɑri ɡere. Nɑ mɑɑ yɛ̃ mɑ nɑ ɡem mɔ.

¹⁹Wɑrɑ u koo kɑ mɑn sikirinɑ nɛn ɡem sɔɔ. Nɑ sɔɔru kpɑ nɑ̀ n tɑɑrɛ mɔ n kɑ nɔɔ mɑri kpɑ n kpunɑ n ɡbi.

²⁰Gusunɔ, ɑ mɑn ɡɑ̃ɑnu yiru yeni kuo, kpɑ n ku mɑɑ nun kukuɑ.

²¹A mɑn wunɛn nɔmu swɛnyɑrio, kpɑ nɑ kun mɑɑ nɑnde.

²²A mɑn sokuo, kpɑ n nun wurɑri. Nɑ̀ n nun kɑnɑ, ɑ mɑn wisio.

²³Torɑnu nyewɑ nɑ nun torɑri. A de n nu ɡiɑ.

²⁴Mbɑn sɔ̃nɑ ɑ mɑn biru kisi, mɑ ɑ mɑn kuɑ nɡe wunɛn yibɛrɛ.

²⁵Wɑrɑ ɑ nɑɑ ɡire. Wuru ɡe ɡɑ kɑ woo doonɔ? Wɑrɑ ɑ nɑɑ swĩi. Yɑkɑ ɡbebusu?

²⁶Mbɑn sɔ̃nɑ ɑ mɑn wɑhɑlɑ bɑkɑ yeni kpɛ̃ɛ, mɑ ɑ mɑn sɛɛyɑsiɑmɔ nɛn ɑluwɑɑsirun torɑnun sɔ̃.

²⁷Mbɑn sɔ̃nɑ ɑ mɑn yɔ̃rɑsiɑ nɡe wìn nɑɑsu bɑ bɔkuɑ kɑ sii yɔni, mɑ ɑ nɛn kookoosu kpuro mɛɛrɑ, mɑ ɑ nɛn nɑɑ dɑbusɑnun ɡeeru yi.

²⁸Wee nɛn wɑsi yi dɑm dwiiyɑ yi sɑnkirɑ nɡe yɑbe te kɔkɔnu di.