Hiobe 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Manaŋgopieŋ, ŋoŋe wiac sasawa muŋgopieŋ i ʒâŋe fâri‐nanezi hone‐fârepo, â hazec‐nanezi mana‐fârerâ mana tarapo.

²Ŋoŋe mamana foŋarekac sâc ijaha wâc no fonarekac, no ŋoŋere wahamicne mi jukopac.

³No ŋoŋe dâŋ ŋazapemurâ mâcne, bapafâre rune dâŋ âzâcnepemurâ manasukopac, no Anutuhec dâŋgie bapemurâ enarekac hâcne.

⁴Ŋoŋe maŋmutuc‐ŋeŋicte fuŋne taniŋkezacte burecdâŋzi foŋkeeŋgopieŋ, ŋoŋe dota mutucne jaŋe ŋic bâpiaŋ‐jopaniŋte eipieeŋgopieŋ jaŋere sâc.

⁵Jâi, ŋoŋe niniŋkerâ jupie muzac mana‐ŋarepe maŋɋârâŋhec juŋgopieŋ ezac.

⁶Ŋicbureŋ, ŋoŋe hazec râehapie fuŋne‐nane mutaniŋke‐ŋarepe, ehuc dâŋ okacne bâtikie‐ŋarepe mana‐hâmoniŋ.

⁷Ŋoŋe burecdâŋ muŋgopieŋ i Anuture erâ muŋgopieŋ me? Me ere dâŋ basanaŋkeniŋte sioc eŋgopieŋ me?

⁸Ŋoŋe dâŋgieo e bafickehuc dâŋticne dopeckeniŋte muŋgopieŋ me?

⁹Anutuzi fuŋne‐ŋeŋic bataniŋkehuc mana‐ŋareme biaŋkeocmu me? Me ŋic eatuc‐jopaeŋgopeneŋ irec sâc ŋoŋe Anutu sâcne eatuckeniŋmu?

¹⁰Nâŋe Anuture dâŋ dopeckeŋgopeneŋ, ŋoŋe burec iŋuc ehuc qoricnuniŋmuo ine eki fuŋne‐ŋeŋic bataniŋke‐jâmbâŋkeocmu.

¹¹Iŋuc eŋareme tâpiri‐ticnere bipic tatara eŋareocmu, ehuc ere hâwic‐ŋopaocmu.

¹²Ŋoŋe dâŋ muŋgopieŋ i racne sasawa, erâ dâŋ okacne bâtikie‐nareŋgopieŋ i fâri tâmiric jaha.

¹³“Ŋoŋe niniŋkehuc mana‐narehapie dâŋnane muzepac, eme irec okacne wiac i me i fua‐narezo murâ fua‐narezejec.

¹⁴No upe‐nane wiwiticko sicnehuc juju‐nane qikiŋ nezo ʒawiekopac.

¹⁵No juju biaŋnere woworic‐nane fârimâc ekac, irec Anutuzi qâhâmocnuzo murâ qâhâmocnuzejec, erâ no sifu ere maio fuŋne‐nane mutaniŋkezepac.

¹⁶Ŋic sindaŋne jaŋe ere maio fuaniŋte hâwic‐jopaekac, no ine hâbihec erâ fuŋne‐nane mutaniŋkecnepe akicnuocmu mecne.

¹⁷Ŋoŋe hazec râehapie fuŋne‐nane muɋaɋacke‐ŋarepe aimuŋ jaha mana‐hâmonʒepieŋ.

¹⁸Manaŋgopieŋ, no Anuturao fuŋne‐nane mutaniŋkehuc ʒiŋuc manapaŋkepemu: Anutu e dâŋnane dopeckeocmu.

¹⁹O Anutu, go dâŋgieo râecnuzo mukomec me? Go iŋuc etec no niniŋkerâ omaezore afeckepemu.

²⁰Mocjaha, go wiac jajahec jahere numu‐garepe mana‐naretec gore hâwicnume mi soŋkepemu.

²¹Go mocwâc mi bâʒâicnuc, erâ wiac hâhâwicne fai‐naneo râetec ferâ mocwâc mi sipiricnuzejec.

²²O Anutu, go fuŋkerâ dâŋ mutec okacne bâtikie‐garepemu, me manatec mi sâckeme ine noni fuŋkerâ mupe goki okacne bâtikie‐narezemec.

²³Kiŋ bahac‐nane wezimuc fokac, erâ wemo hehesicne moc bâfuapo i nazatec manape.

²⁴Go wemocte honecnutec râsige tinac ehape ʒâŋe maige bâsoŋke‐narekomec?

²⁵No mâŋâŋzi rehac ficne sueme raekac irec sâc juhape hâhâwic henarezo ekic me? Erâ sopâc hahaŋkekicne irec sâc ehape ficne suecnuzo mukomec me?

²⁶Go bâbâtiŋ hâhâwicne fai‐naneo râetec fekac, ehuc ɋie‐naneo wiac ebac epo irec okacne wâc mâmâc bazu‐narekomec.

²⁷Go kike‐nane jâc fifitacko râekomec, ehuc hata rahape ruc banarehuc kike hata‐nane hetâcnekomec.

²⁸Go iŋuc enaretec no jâczi semune ehuc gârecke ʒaŋ eekac irec sâc jaha ekopac, â wâfu qoʒazaŋzi ŋaqi qoruc nanʒaŋnepie ʒaŋkeekac, irec sâc jaha ʒaŋkekopac.