Job 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Job bin kipgon tok, “Ai sabi ebrijing blanga dijan wel.

²Yumob nomo sabi mowa den mi. Ai sabi ebrijing yumob sabi.

³Bat ai garra kipgon agaminbat langa God en dalim im blanga main trabul.

⁴Yumob brabli medwan dokta. Yumob oldei tridimbat mi garram ola laiyawan wed wen yumob tok aibin dum nogudbala ting.

⁵If yumob jidan kwaitbala en lisin langa mi, wal yumob brabli klebabala.

⁷“Maitbi yumob reken yumob oldei albumbat God, bat najing. Yumob dalimbat laiya,

⁸en yumob nomo tok rili trubalawei blanga im. Imbin askim yumob blanga albumbat im?

⁹Yumob reken yumob gin trikim im, if im deigim yumob langa kothaus, jis laik yumob trikimbat najalot pipul?

¹⁰If yumob nomo bin gibit feyago langa najalot pipul, im gin panishim yumob.

¹¹En det strongbala pawa blanga im gin bradin yumob brabliwei.

¹²Yumob reken yumob tok gudbalawei, bat im gin blowimwei ol yumob wed jis laik das.”

¹³Wal Job bin kipgon tok, “Yumob jidan kwaitbala, dumaji ai garra tok na, nomeda wanim garra hepin langa mi.

¹⁴Im orait, nomeda if ai dai. Ai nomo wori.

¹⁵Dijan laif blanga main im nomo enijing na. God gin kilim mi, bat stil ai garra kipgon dalimbat im mi nomo gilti.

¹⁶Maitbi dijan na garra seibum mi, dumaji nomo eni giltiwan men garra kaman langa God langa det kothaus.

¹⁷“Yu irrim brabli gudwei langa ol dislot wed blanga main na.

¹⁸Aibin meigim main wed redibala na, en ai sabi ai garra win, en God garra tok mi nomo gilti.

¹⁹Bat if yumob gin shoum mi giltiwan, wal ai garra lafta gibap en dai.” Lagijat na Job bin tok.

²⁰Wal Job bin prei langa God, “Ai garra askim yu oni blanga dubala ting, main God. If yu ensim mi ai kaan neba blandim miselp brom yu.

²¹Stap panishimbat mi en bradinim mi.

²²Yu tok en ai garra ensim yu, o yu larram mi tok basdam, en afta yu ensim langa mi.

²³Yu dalim mi blanga main nogudbalawei wulijim ai garra sabi.

²⁴Wotfo yu nomo bin teiknodis langa mi? Wotfo yubin meigim mi enami blanga yu?

²⁵Maitbi yu laigim bradinimbat mi wen mi oldei jidanbat wikwan. Mi jis laik det draiwan lif weya im buldan.

²⁶“Wotfo yu oldei tok aibin oldei dumbat brabli nogudbala ting? Wotfo yu oldei panishimbat langa mi blanga ol detlot nogudbalawei weya aibin oldei dumbat wen aibin yangwan?

²⁷Yubin taiyimap main dubala fut, en yubin oldei lukabat main trek weya aibin oldei go.

²⁸Mi jidan brabli nogudwan, jis laik det reig weya detlot badaflai bin dagadagat.”