Job 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹«Chaycunataga llapantapis quiquëmi ricashcä; quiquëmi wiyashcä.

²Gamcuna musyashayquitaga nogapis musyämi. Nogapis gamcunanömi cä.

³Chaymi gamcunawan parlanäpa ruquin Dioswan parlayta munä. Ima-aycapäpis munayniyoj Tayta Diostami tapucuyta munä.

⁴Gamcunaga llullacushpayquimi rasun cajta mana rimanquichu. Gamcuna mana alliyächicoj jampicojnömi carcaycanqui.

⁵Gamcunaga mana yarpachacuypami rimaycanqui. ¡Ima alliraj canman upällalla cacuptiqui! Chauraga yachaj runacunanami canquiman.

⁶«Canan ichanga nogatana wiyaycäramay. Noga imanir cayno rimaycashätapis willapäshayqui.

⁷¿Llullacushayquiwanchi Diospa faburnin cayta yarpaycanqui? ¿Llullacur rimashayquiwanchi Diospaj allita rimaycashayquita yarpanqui?

⁸¿Gamcunaga Diospa faburninchi carcaycanqui? ¿Imanöllapapis faburnin caytachi munarcaycanqui?

⁹Ichanga ¿imaraj canga Tayta Diosninchi taripashuptiqui? ¿Runata riguichejnöchuraj paytapis riguichinqui?

¹⁰Pacayllapa paypa faburnin captiquega fiyupami piñacushunquipaj.

¹¹Tayta Diosga munayniyoj carmi fiyupa mancharachishunquipaj.

¹²Gamcuna parlashayquicunaga lliptanöllami caycan. Chapacur rimashayquicunapis caycan mitullapita perganömi.

¹³«¡Rimamushäta wiyanayquipaj upällalla wiyamay! ¡Imapis päsarga päsaramächun!

¹⁴Wañunä captinpis rimashämi. Imano canä captinpis manami manchacöchu.

¹⁵Pay wañuchimänan captinpis jinallami shuyäcushaj. Paypa ñaupanchömi chapacur rimashaj.

¹⁶Capaschari chayräpis salbacöman. Juchasapa runaga manami chayanmanchu pay cajman.

¹⁷Parlamushäta wiyashpayqui sumaj tantiyacuy.

¹⁸Nogaga chapacurmi rimashaj. Nogaga rasunpami juchaynaj caycä.

¹⁹Juchayoj cashäta pipis cäramaptenga upällallami cacushaj wañunäcamana.

²⁰«Tayta Dios ishcay yarpayta ruwacushayqui. Chaura gampitaga manami pacacushänachu.

²¹Ama castigaycamaynachu ari. Amana munayniquiwan manchaycachimaynachu.

²²Chauraga imata tapumaptiquipis willashayquimi. Man'chäga noga tapucuylläta gam willaycamay.

²³Mä willaycamay ari Tayta. ¿Imataj juchä? ¿Pitataj wañuchishcä?

²⁴¿Imanirtaj nogapita pacacunqui? ¿Imanirtaj contrayquitano ricamanqui?

²⁵Wayracho tumaycaj rapranölla caycaptëga ¿imanirtaj illgächimayta munanqui? Chaquisha ogshanölla caycaptëga ¿imanirtaj gaticachaycämanqui?

²⁶Castigamaptiquimi llaquicur wagar goyaycä. Mösu car jucha rurashäcunapita ñacaycächimanqui.

²⁷Chaquëcunatapis cadinacunawannömi watarcushcanqui. Imata rurashalläpitapis jusgaycämanquimi. Imata rurashallätapis ashiycanqui.

²⁸Imapis ismur ushacaycajnömi ushacaycä. Röpata puyu ushashannömi caycä.