1Doduru ginugua sapu zamani rau si ele dogori na avosi tu rau meke tumaeni. Sapu gilani gamu, si gilani tugo arau. Lopu hola nau gamu si arau, kekeṉoṉo mo si gita.
3Ba hiva zama si arau koa sa Tamasa sapu tagoi sari doduru ṉiniraṉira, lopu koa gamu; sa qua ginugua si hiva toke nia arau koa Sa.
4Na koha mo si mae tozi gamu koa rau; gua rina dokita sapu lopu tumae salaṉa tie.
5Be lopu zama gamu, si kote na tie gilae mia guni gamu ri na tie.
6Va avoso totoso va bakali arau sari qua binalabala, avosi sari tinepatepa pa beruqu.
7Na vegua ke kokoha si gamu? Na koha ponia sa Tamasa, gua si gamu?
8Na hiva lavelave nia gamu sa Tamasa? Hiva zama ponia gamu si Asa pa vetu varipitui?
9Be doṉo viliti gamu sa Tamasa, si vea, kote dogoro kaiqa lineana tugo si Asa? Rovea gamu si kote boka sekesekei nia gamu sa Tamasa, gua sapu hoke tavete la nia gamu pa tie?
10Lokari, na kote gegese gamu Sa, be lopu hinokaradi sari mia zinama vinari tokae la koa Sa.
11Vea, lopu kote matagutu nia mia sa ṉiniraṉira Tanisa? Babe holoqoru nia sa minatagutuna Sa?.
12Sari mia zinama tumatumae si loke laedi gua tugo na eba; meke sari mia zinamazama si malohorodi mo gua na nelaka.
13Mi noso paki, poni paki nau totoso pude zama, meke kote va tia ia rau nasa si kote ta evaṉa.
14Uve, va nama si rau, be sa si raza mae, sa qua tinoa si va nama nia arau.
15Be va mate au sa Tamasa, ba kaqu lavelave nia rau sa qua tinoa koa Sa, sina raṉea rau si Asa.
16Hokara sa qua minataqara si kote ta harupu nia rau, sina loke tie kaleana si kote balabala sapu boka turu pa kenuna sa Tamasa.
17Ego avoso va leana mae koari qua zinama, sari qua vina bakala, mamu avosi.
18Ele va namanama si rau pude tozi nia rau sa Tamasa sa qua ginugua, sina gilania qua rau sapu toṉoto si rau pa kenuna Sa.
19Esei hiva toke au koasa ginugua hie? Pude gua sa Tamasa, si nama si rau pude noso meke mate.
20Ba karua tiṉitoṉa mo si hiva ni rau Tamasa, va malumu mae ni koa rau, meke lopu kote tome nigo rau si Agoi:
21Va noso ia sa Mua vina kilasa, meke beto, Mu lopu va matagutu au.
22Mu zama mae Tamasa, maqu olaṉa si rau: babe maqu zama si rau meke Agoi kote olaṉau.
23Sa sari qua sinea? Sa si tavete va sea i arau? Na tinavete kaleadi sa si ta pitu ni arau?
24Na vea ke liṉana va seu Mua, meke etulu guni nau na Mua kana?
25Hiva va matagutu au Goi? Ba na elelo mo si rau. Guana raza duduli popana si Agoi.
26Ura kubere i Goi sari na tinavete pasadi pude va pitu nau, na sinea totoso vaquraqu tu ba vagi mae ni Goi.
27Guana pusi nau seni Goi nenequ; kopu tototoko ni Goi sari qua rinizu, viliti Goi sari doduru qua tinavete na inene.
28Gua asa ke, vuvusu palae guana popozu huda mo si rau, guana poko sapu gania na kikiti.
