Iyyooba Maxaafaa 34:18-34

¹⁸Xoossai kawota, ‘Intte shufurota’ yaagees; qassi biittaa haariyaageetakka, ‘Intte iita’ yaagees.

¹⁹Halaqatu som77uwaa xeellidi maaddenna; duriyaakka manqquwaappe aattidi xeellenna. Aissi giikko, eti ubbaikka a oosota.

²⁰Eti hekka bilahe akeekennan haiqqana; asai ubbaikka kokkoridi xayana; wolqqaamatikka ai asa kusheenne bochchennan kichchana.

²¹“Xoossai asaa hemetaa xeellees; a tanggo ubbaakka wochchees.

²²Iitaa oottiyaageeta Xoossaappe genttanau danddayiya sakkana xumi baawa.

²³Xoossai asaa bolli pirddanau, asai a sintti shiiqanaadan keero immenna.

²⁴Wolqqaamata ainne oichchennan mentterettees; yaatidi eta sohuwan haraata wottees.

²⁵I eta oosuwaa eriyo gishshau, eta issi qammi maataappe wottidi xaissees.

²⁶Eta iitatettaa gishshau, asi ubbi be7iyoosan i eta qaxxayees.

²⁷Qaxxayiyoogeekka eti a kaallennan ixxidi, a azazuwaakka aggido gishshaassa.

²⁸Eti hiyyeesata huqqunnidi, eta Xoossaakko waassanaadan oottidosona; oottin Xoossai hiyyeesatu waasuwaa siyiis.

²⁹Xoossai co77u giikko, a pirddanai oonee? I ba som77uwaa wora zaarikko, asa maaddiyaabi baawa.

³⁰Hegaadankka, Xoossaassi yayyenna asati haarennaadaaninne asaassikka gite gidennaadan, asai ubbai digganau danddayenna.

³¹“Iyyoobaa, ne nagaraa Xoossaayyo paaxadii? Qassi zaarada nagara oottennaadan geppadii?

³²Ne mooruwaa neeyyo qonccissana mala, Xoossaa woossadii? Sinttanau iita ooso oottennan agganau maayadii?

³³“Neeni Xoossai oottiyoobaa ixxaidda, ne waagai neeni dosiyoogaadan hananau koyai? Simmi qofaa qachchanai nenappe attin, tana gidikke. Hegaa gishshau, neeni qoppiyoobaa taayyo yoota.

³⁴Akeekanchcha asati taani yootiyoogaa maayoosona; taani odiyoogaa siyiya aadhdhida eranchchatikka hagaadan yaagoosona;