Iyyooba Maxaafaa 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hegaappe guyyiyan, Temaana biittaappe yiida Elifaazi zaaridi, hagaadan yaagiis;

²“Issi uri nenaara xalidi haasayikko, neeni lanccuutee? SHin haasayennaaninne agganai oonee?

³Be7a, neeni darota tamaarissadasa; arggaacida kushetakka minttettadasa.

⁴Ne qaalai xubettidaageeta kaafidi essiis; daafurida gulbbatatakka minttiis.

⁵SHin ha77i metoi neekko yiis; yin neeni genccabaakka. Metoi nena gakkin, neeni shabbirettadasa.

⁶Neeni Xoossaassi yayyiyoogee nena ammanttidi wottennee? Ne hemettiyo suure hemetai neeyyo hidoota gidennee?

⁷“Ane neeni ha77i qoppa: geeshsha gidida asan xayidai oonee? Woikko suure asi awan xoqollettidi xayi erii?

⁸Taani be7idoogaadan, iitatettaa goyidi, metuwaa zeriyaageeti iitatettaanne metuwaa cakkana.

⁹Eti Xoossaappe kiyiya shemppuwan punettidi bayana; a hanqquwaa peenuqettankka eti meetetti xayana.

¹⁰Iitati gudiyaanne daariya gaammotu mala; shin Xoossai eta co77u ootteesinne eta achchaa menttees.

¹¹SHankkatidi miyoobaa demmibeenna gaammotudan, iitati namisan haiqqoosona; eta naatikka laalettoosona.

¹²“Issi gallassi issi xuuri taakko yiis; he xuurai saasukettidi, ta haittan wodhdhiis.

¹³Taani qammi xiskkuwaa kairidaashin, tana iita aimoi un77ettiis.

¹⁴Tana yashshainne kokkorssai oiqqiis; oiqqidi ta meqetta ubbaa gajigajissiis.

¹⁵Issibai ta som77uwaa pittiiddi, ta sinttaara kanttiis; kanttin dagamaappe denddidaagan ta bollan de7iya beelaalai eqqiis.

¹⁶I ta sinttan eqqiis; shin i aibakko taani shaakkada eranau danddayabeikke. Hegaappe guyyiyan, co77u giidasaappe hagaadan yaagiya cenggurssaa siyaas;

¹⁷‘Haiqqiya asi Xoossaa sinttan xillo gididi beettanau danddayii? Woikko asi bana Medhdhidaagaa sinttan geeshsha gididi beettanau danddayii?

¹⁸Xoossai ba ashkkaratun ammanettenna; ba kiitanchchatunkka mooruwaa demmees.

¹⁹Yaatin, urqqaappe merettidaageetun, eta de7uwaa baasoi baanaa gididoogeetun, bil77aappekka eesuwan haiqqiyaageetun ai keena daro mooroi beettanddeeshsha!

²⁰Maallado paxa de7iya asi omarssi gakkanaashin, ooninne hassayennan de7ishin haiqqees.

²¹Eta de7uwaa xishee shodetti wodhdhiyo wode, eti aadhdhida eratettaa demmennan haiqqi bayoosona’ yaagiyaagaa siyaas.