Job 34:18-34

¹⁸God e hagi aga nia king mono gau aamua huogodoo maa digaula e huaidu, deai nadau hadinga ai.

¹⁹Mee hagalee e huli mai i di baahi o nia dagi, gei hagalee e hiihai gi digau ala e maluagina laa hongo digau hagaloale. Idimaa go Mee dela ne hai ana daangada huogodoo.

²⁰Tangada le e mee hua di made limalima i di boo. God le e hagaduadua nia daangada, gaa hidi ai digaula ga hagalee. E haingoohia ang gi Mee dono daaligi gii mmade digau ala e aamua.

²¹Mee e hagadina nia hanga heehee o nia daangada ala ma ga haihai.

²²Deai di bouli e mee di abaaba gi daha tangada huaidu i mua nia hadumada o God ai.

²³God la hagalee bolo gaa dugu dana madagoaa e lloo aga ai nia daangada gi dono baahi e hagadonu go Mee.

²⁴God la hagalee bolo e hai dana halahala, e daa gi daha nia dagi e pono gi nnuai daangada.

²⁵Idimaa Mee e iloo nadau mee ala e haihai, Mee gaa kili digaula gi daha, ga dagadagahi digaula i di boo.

²⁶Mee e hagaduadua digau huaidu i lodo di gowaa dela e dogologo nia daangada,

²⁷idimaa digaula gu huli hua gi daha, gu diiagi ana haganoho huogodoo.

²⁸Digaula guu hono digau hagaloale bolo digaula gi dangidangi i di hagamaamaa mai baahi o God. Gei Mee ga hagalongo gi nia dangidangi digaula.

²⁹“Maa God ga hagamaanadu bolo Ia ga hagalee e hai ana mee, deai tangada e mee di haga hai gee a Mee ai. Maa Mee gaa hai gii ngala ono hadumada, malaa, gu deai di hagamaamaa ang gi nia daangada ai.

³⁰Deai dahi mee i golo ai bolo gaa mee di hai go dahi henua, bolo e daa gi daha nia mogobuna o digau huaidu ala e dagi ginaadou.

³¹“Job, goe gu haagi o huaidu gi God, mo di hai dau hagababa gi Mee bolo goe ga hagalee e hai di huaidu labelaa?

³²Goe gu halahala gi baahi o God au mee hala ala ne hai, gei goe guu donu bolo goe ga hagalee hai di hala labelaa?

³³Idimaa goe dela hagalee e donu gi di mee a God dela ma gaa hai, goe e talitali bolo Mee gi haga gila ina aga dau mee dela e hiihai ginai? Ma kooe dela e hai gii hai dau mee, gei hagalee ko au. Goe gi helekai mai gi gimaadou dolomeenei i dau mee dela gu hagamaanadu.

³⁴“Digau huogodoo ala iai nadau hagamaanadu i golo, digaula gaa donu ginai, gei tangada kabemee dela ma ga hagalongo mai, ia ga helekai aga