Iyyooba Maxaafaa 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Iyyoobaa, ane xeesa! SHin oonee neeyyo koyanai? Kiitanchchatuppe ookko simmuutee?

²Eeyya uraa lanccee worees; akeekai paccido uraakka qanaatee xaissees.

³Eeyya urai minnidi de7iyaagaa taani ta huuphen be7aas; shin sohuwaarakka taani a keettaa qanggaas.

⁴A naati saroi bainnasan de7oosona; eti shilootan, maaddidi haasayiyaabi bainnasan kinchchettidosona.

⁵I shiishshido kattaa namisettidaageeti maana; agunttaa giddon mokkidaagaakka eti ayyo aggokkona. Saamettidaageeti a aquwaa ekkanau hel77oosona.

⁶Tuggai baanaappe kiyenna; metoikka biittaappe mokkenna.

⁷Tamai piri wodhdhiyoogaadan, asi metuwau yelettiis.

⁸“Tana gidiyaakko, taani Xoossaakko shiiqana; ta mootuwaakka a sinttan wottana.

⁹Gidduwaa pilggidi eranau danddayettenna gitabatanne qoodi bainna oorattabata Xoossai oottees.

¹⁰Iraa biittan bukissees; gadiyaukka haattaa yeddees.

¹¹Ziqqi giidaageeta xoqqu xoqqu oottees; kayyottiyaageetakka minttettidi ufaissees.

¹²Genanchchatu halchchuwaakka halissees; hegaa gishshau, eta kushiyaa oosoi polettenna.

¹³Aadhdhida eranchchata i eta geniyan oiqqees; geellatu maqquwaakka aatti yeggees.

¹⁴Etau gallassai xumana; gallassa seetankka eti henqqeleela bilahiyaadan tattaafana.

¹⁵Hiyyeesata i eta morkketu bisuwaappe ashshees; i eta wolqqaamatu kushiyaappekka wotti ekkees.

¹⁶Hegaa gishshau, hiyyeesatuyyo hidootai de7ees; iita asata i co77u oottees.

¹⁷“Xoossai seeriyo uri anjjettidaagaa; hegaa gishshau, Ubbaa Danddayiya Xoossaa seeraa karoppa.

¹⁸I masunxxissees, shin masunttaa qachchees. I dechchees, shin a kushee xallees.

¹⁹Usuppun qommo metobaappe i nena ashshana; laappunttikka nena bochchenna.

²⁰Koshaa wode haiquwaappe, olaa wodekka bisuwaa qaraappe i nena ashshana.

²¹I nena inxxarssaa lissuwaappe genttana; bashshai gakkiyo wodekka yayyakka.

²²Bashshaa bollinne koshaa bolli neeni miiccana; bazzo do7atuyyookka yayyakka.

²³Ne goyiyo goshshan shuchchi de7enna; bazzo do7atikka nenaara saro gidana.

²⁴Ne dunkkaanee saro gidiyoogaa neeni geeshshada erana; ne dorssatu birddiyaakka neeni xomoosiyo wode, etappe issoinne paccenna.

²⁵Ne yeletai corattanaagaanne ne zerettatikka dembbaa maataa keena gidanaagaa neeni erana.

²⁶Gisttiyaa mirqqee ba wodiyan audiyaa yiyoogaadan, neeni adda cimada, duufuwaa baana.

²⁷Iyyoobaa, nuuni hagaa ubbaa pilggi xeellida. Hegee tuma gidiyo gishshau, hegaa siyada, neeyyo ekka” yaagiis.