Hiop 34:18-34

¹⁸I ewe mi apasa ngeni eman king, ‘Ka lomotongau,’ ika ngeni ekewe aramas tekia, ‘Oua aramasangau.’

¹⁹Esap lifilifil ngeni samol, esap pwal aücheani ekewe chon wöümong lap seni ekewe chon wöüngau, pun a föriir meinisin.

²⁰Lon eu chök otun aramas ra mäla lukenipwin. Ekewe aramas ra chechech o mäla. Pöün Kot a angeala ekewe chon pwora, nge sap pöün eman aramas.

²¹Mesen Kot a afota alen ekewe aramas, a nengeni fefetalin pecher.

²²Esap wor eu leni mi kiroch ika rochokich ia ekewe aramasangau ra tongeni aopeer ie.

²³Kot esap afata eu fansoun inet aramas repwe feito fän mesan pwe epwe eäni kapwüng ngeniir.

²⁴A asapwilätiu ekewe mi nemenem, nge esap osun an epwe akomwen atikinöör, mürin a atolonga ekoch lon lenier.

²⁵Pokiten a silei ar föför, a atururetiu o atatakisiir lepwin.

²⁶A apwüngüür me fän mesen aramas meinisin pokiten ar föföringau,

²⁷pun ra kul seni ar tapwela mürin, nge resap afäli an kewe allük.

²⁸Ir popun pwe ekewe chon wöüngau ra kökköri Kot pwe epwe alisiir, nge i a rongorong ar siö.

²⁹Are Kot a fanafanala, iö epwe tongeni apwüngü? Are i a amona mesan, iö epwe tongeni küna? Nge Kot a nemeni eman aramas usun chök an nemeni chon eu mwü,

³⁰pwe esap mwüt ngeni ätewe esap aleasochis ngeni epwe nemenem o atupu ekewe aramas.

³¹A mürina än eman aramas epwe pwäri ngeni Kot, ‘Üa tipis, üsap chüen föri och mi mwäl.

³²Kopwe aiti ngeniei mine üsap küna. Are üa föföringau, üsap chüen förisefäli.’

³³Are en Hiop kosap mochen ekieksefäl, pwota Kot epwe liwini ngonuk usun en ka mochen? En kopwe püsin pälüeni ei kapas ais, nge sap ngang. Iei mine kopwe pwärätä met mefiom.

³⁴Aramas mi mirit repwe tipeeu ngeniei, nge chokewe mi tipachem repwe üreniei, lupwen ra rongorong ai kapas,