ISƆBU 34:18-34

¹⁸Kuù mɑ́ɑ̀ ɔ̃ɔ̃ nɑ́kɛ́ okpɑ̀ɑ̀tì kɛ dɔ̀ ò tu oyɛiwe, kɛ́nɑ́kɛ́ sikpɑ̀ɑ̀tìbìí kɛ dɔ̀ sì tu bɛnitikɔ̀ùbɛ̀.

¹⁹Kuyie nkunku í kommu sikpɑ̀ɑ̀tìbìí, kù ɔ̃ɔ̃ í nwúó nhokpɑ̀ɑ̀tì kɛ̀ dɛ̀ pɛ̃ɛ̃tɛ́ fɛdɑwɑnfɛ̀, kɛ yɛ̃́ kuù bɛ̀ dɔ̀ɔ̀mɛ̀ bɛmɔu.

²⁰Bɛ̀ ɔ̃ɔ̃ kúmu dimɔ̀nnì dimɑ́ɑ̀ kɛyènkɛ̀ cuokɛ̀, Kuyie nkuù ɔ̃ɔ̃ bɛ̀ potɛ́ kɛ́ bɛ̀ mɛ̀ɛ̀rɛ̀ kɛ̀ bɛ̀ɛ kú. Kù ɔ̃ɔ̃ í mpotɛ́ okperì nɛ̀ muwɛ̃rímú kɛ nɛ́ ò kùɔ.

²¹Kuyie nwùómmu bɛnìtìbɛ̀ bɛmɔu dɔɔ̀rìmɛ̀, kù yɛ̃́mu bɛ̀ kèrí ìì cɛ imɔu.

²²Dibiìnnì diɛrì mɑrì í bo yoo kɛyensɔ̀ùkɛ̀ mɛyɛi ndɔɔ̀rìbɛ̀ bo sɔri dɛ̀.

²³Dɛ̀ í békú Kuyie nkù bo wénnímɛ̀ onìtì kɛ̀ dɛ̀ɛ mɔntɛ, kɛ̀ kù nɛ́ nɑ kóò bekɛ́nɛ̀.

²⁴Kuyie nhɔ̃ɔ̃ í mpɑɑtɛ́ bɛkperíbɛ̀ kɛ nɛ́ nɑ kɛ́ bɛ̀ pɔ̀ntɛ, kɛ́kɑnnɛ bɛtɔbɛ̀ bɛ fɔ̃̀tɛ̀.

²⁵Kù yɛ̃́mu bɛ tɔ̃mmú mumɔu kɛ yóó bɛ̀ kpɛ́i, kɛ́ bɛ̀ pɔ̀ntɛ kɛyènkɛ̀ kɛmɑ́ɑ̀.

²⁶Kù bɛ̀ puotì bɛnitiyɛibɛ kɔ̃mɛ mmɛ, kupììti ììkɛ̀.

²⁷Bɛ̀ kù bùtínnɛ́ mɛ̀ɛ̀ kpɛ́í nkɛ kɛ tɛ̃́nkɛ í dɔ́ kɛ́ nkù tũ, bɛ̀ í yie nkɛ bo bɑntɛ́ ku kó itié mmɑì.

²⁸Bɛɛ̀ duɔ́ nkɛ̀ bɛcĩ̀rìbɛ̀ dɑbùò ndèkù ku borɛ̀, kù kèèmu bɛsénnìbɛ̀ kuɔ̀mmɛ̀.

²⁹Kɛ̀ kù dò nkɑ́rɛ́ we mbo kù sɛi? Kɛ̀ kù sɔ̀nnɛ kumɑ́ɑ̀ we mbo kù yɑ̀? Kù mɛ ndɑ̀kɛmu yɛbotɛ̀ nɛ̀ bɛnìtìbɛ̀ dɛ kpɛ́í.

³⁰Kuyie nyí dɔ́ bɛniticiìmbɛ̀ bo mbɑkɛ́mɛ̀ bɛ̀ yɑ̀ɑ̀ bo nɑɑ́ ndidíìntɑ̃́rì kɛ́bɔ nkubotí.

³¹Kɛ̀ dɛ̀ dò ndɛ yiɛ̀ mbo nɑ́kɛ́ Kuyie nkɛ dɔ̀: n yiemmu n yetímɛ̀ n tɛ̃́nkɛ bɑ́ɑ́ dɔɔ̀ mɛyɛi.

³²N cɑ̀ɑ̀rɛ̀ dɛ̀ kɛ̀ mu nyí yɛ̃́, ɑ dɛ̀ nni mbɛnkɛ n tɛ̃́nkɛ bɑ́ɑ́ dɛ̀ yìɛ́.

³³A yɛ̀mmɛ̀ dò nkuù ò potɑ́ɑ̀? A í mɛ̀ nyiemmɛ̀ kù tɑ̃ɑ̃tɛ́ tì, fɔ̃́ɔ̃̀ mɛ̀ nyɛ̃́mɛ̀ kù dò nkɛ́dɔɔ̀ tì, ɑ tũ nnɑ́kɛ́ ti.

³⁴Bɛ̀ɛ̀ mɔ̀kɛ mɛyɛ̀mmɛ̀ bɛ̀ yóó bɛ́immu, mɛciì nyɛmbɛ̀ bɛ̀ɛ̀ n kèḿmú bɛ̀ bo yĩ́: