Iyyooba Maxaafaa 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yaagin Iyyoobi zaaridi,

²“Ta waayeenne ta azzanoi ubbai meezaanan likketteerenneeshsha!

³Yaatiyaakko abbaa doona shafiyaappekka aadhdhi deexxana. Hegaa gishshau, ta qaalai xala gidiis.

⁴Ubbaa Danddayiya Xoossaa wonddafiyaa zubbeti tana caddidosona; ta bollaikka eta yiishshaa uyees. Xoossaa dagamai ta bolli salppiis.

⁵Haree maatai a sinttan de7ishin caaggiiyye? Woikko boorai phachchaa demmidi xaaggiiyye?

⁶Mal77ennabi maxinee gelennan meetettiiyye? Woikko phuuphulle giddo haattai laqilaqiiyye?

⁷Hegaa mala qumaa taani shenetais; hegaa mala qumaa miikko, tana sakkees.

⁸“Taani woossido woosai gakkeerenneeshsha! Xoossaikka ta wozanaa amuwaa immeerenneeshsha!

⁹Xoossai tana woreerenneeshsha! I ba kushiyaa yeddidi, ta de7uwaa turaa duutteerenneeshsha!

¹⁰Taani Geeshsha Xoossaa qaalaa kaddabeenna gishshau, taayyo seelai darikkonne, ta haiqoi tana minttettees.

¹¹Taani paxa de7anau taayyo aiba wolqqi de7ii? Taani danddayanau, ta wurssettai aibee?

¹²Ta wolqqai shuchchaa wolqqaa malee? Woikko ta ashoi nahaase birataa malee?

¹³Taani tana maaddanau aiba wolqqinne taayyo baawa; maado demmanau taani biyoosikka de7enna.

¹⁴“Metuwan de7iya uri Ubbaa Danddayiya Xoossaassi yayyiyoogaa aggiyaakkokka, a laggeti ayyo kehatettaa bessanau koshshees.

¹⁵Ta ishatoo, intte irai bukkenna wode meliya shaafaa mala, tana cimmeeta.

¹⁶Balggo aginatun he shaafai ordde shachchaaninne suuppa shachchan kumees.

¹⁷SHin bonee gakkiyo wode, he shachchai seeridi, haatta kiyees; haattaikka he sohuwaappe xayees.

¹⁸Caana mehiyaa laaggidi biya zal77anchchati haatta koyanau bantta ogiyaappe gaxi kiyidi, bazzuwan toilattiiddi, haiqqi xayoosona.

¹⁹Teema biittaa zal77anchchatinne Saaba biittaa manddarati haattaa demmana giidi, koshshaa buusidosona.

²⁰SHin eti ammanettidi koyin xayido gishshau, yeellatidosonanne hidootaa qanxxidosona.

²¹Inttekka taayyo he shaafatu mala gidideta; tana gakkida metuwaa be7idi yayyideta.

²²Taani inttena, ‘Taayyo issibaa immite’ woikko, ‘Intte aquwaappe ta gishshaa asassi mattaayiyaa immite’ giidanaa?

²³Woikko, ‘Tana ta morkkiyaa kushiyaappe ashshite’ woikko, ‘Huqqunniyaageetu kushiyaappe tana wozite’ giidanaa?

²⁴“Intte tana tamaarissite; taani co77u gaana. Taani ai mooridaakko, ane tana bessite.

²⁵Tuma gidida qaali caddees! SHin intte taayyo odiyo seerai ubbai tana ainne maaddenna.

²⁶Intte taani haasayiyo haasayaa carkko mala giidi qoppeeta. Yaatin, taani hidoota qanxxada haasayiyo haasayaa aissi qoreetii?

²⁷Aawai bainnaageeta shaakki ekkanau intte saamaa yeggeeta; intte laggiyaakka baizzanau washisseeta.

²⁸Ane tishshi oottidi, tana xeellite. Taani intte sinttan wordduwaa haasayikke.

²⁹Hayyanintta, ane zaarettidi qoppite; taani xillo gidiyo gishshau, ta bolli coo pirddoppite.

³⁰Taani ta inxxarssan worddotidobaa milatii? Ta doonai wordduwaanne tumaa shaakkidi haasayanau danddayennee?