Job 34:18-34

¹⁸Reymar, degi, dule-dummagan isganamalale, ar Bab-Dummad gwen binsaosulid mer an oakalogodeeye.

¹⁹Bab-Dummad dule-negsemaidba nagusulid. Degi, dule-mani-ibedba nagusulid, dule-mani-satedba nagusurbalid, bela emarbi daked. Bab-Dummad bela emarbi amar-imaksad.

²⁰Dulemar ukiagwar mutikidba burgwiddamalad. Dulemar oimakbukwadamalad, degi, berguddamalad. Dule-bulegan-negsedimaladi, negsediidgi dule-oakalossuli ukiagwar egwalleddamalad.

²¹”Bab-Dummad bela dulemar-gudiid dakmaid, bela dulemar-e-gudiidgi nakulediid.

²²Dule-isganamarde negsichidgi, neg-guduregedgi dukuye-sogele, gege amba Bab-Dummadgi dukued.

²³Bab-Dummad, dulega igar-nabogega dulega iba messulid.

²⁴Bab-Dummad dule-bulegan-negsemamaid-onogegala, igar-amiegala, emarse idaksulid. Amar-muchub dule-baid omesed.

²⁵Bab-Dummad dulemar-ibmar-imaked bela wisid, mutikidbali egi gwisgued, bela ese ibitomalad.

²⁶Bab-Dummadi, bela dulemar dakmalaga, dule-e-isguedbali, dule-sabsur-odurdaked.

²⁷Dulemar Bab-Dummadgi-banguddamaladbali, degi, eba ibsasurdamaladbali, deyob gunonidamarsunnad.

²⁸Degine, wemar sabsur dule-wilemalad-obosmalad, sabsur dule-ibmar-abese-gudimalad-wiosmalad. Degidbali, Bab-Dummad dule-wilemalad-e-ogormaked itosad.

²⁹Ar Bab-Dummad ibmar sogsulile, ¿doa ega akar sogosunna? Dule geg ega akar soged. Ar Bab-Dummad dule-idu wagar-odukuele, ¿doa e-wagar dakosunna? Bab-Dummadi, bela dulemargi nakulemaid,

³⁰adi, dule-isganamar mer negsemalagar, degi, mer dulemar-yardakdii gumalagar.

³¹”Job, amba be Bab-Dummadga weyob sogele: ‘Nabirye, nue an nosye, bar an begi yolegosurye.

³²Be an-odurdaksunye, magar-neg-itogedse be an-imakye. An ibmar-isgana-imaksadi, bar an imakosurye.’

³³Job, be deyob sogdibe, degite, be Bab-Dummad-obacha-inigwele, ¿Bab-Dummad bega be-ibmar-abeged uked abesunde? Sulirgebed. Andi be-ular sogosulid, ar bee be sogoedid. Degisoggu, na be-binsaedi be soge, igi na be binsae.

³⁴”Bemar, an-itobukwadi dule-binsaed-ibeganad, be magar neg-itomaladid. Degisoggu, be anga sogmardo: