Iyyooba Maxaafaa 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hegaappe guyyiyan, Temaana biittaappe yiida Elifaazi hagaadan yaagidi zaariis;

²“Asi Xoossaa go77anau danddayii? Harai atto aadhdhida eranchcha gidiyaakkokka, i bana go77anaappe attin, Xoossaa go77enna.

³Neeni xillo gidikko, hegee Ubbaa Danddayiya Xoossaa ufaissii? Ne ogee boree bainnaagaa gidikko, hegan i aiba wore demmii?

⁴“Neeni ayyo yayyiyo gishshaassee, i nena seeriyoogeenne pirddiyoogee?

⁵Ne iitatettai daro gidennee? Ne nagarau zawi baawa.

⁶Neeni ne ishata gaasoi bainnan waasiyaa xeesissadasa; asaa maayuwaakka qaarada eta kallo ashshadasa.

⁷Neeni saamettidaageeta haattaa ushshabaakka; namisettidaageetakka qumaa diggadasa.

⁸Neeni ne wolqqaaninne ne maatan zemppada, hara asaa biittaa neeyyo coo ekkadasa.

⁹Am77eta mela kushe yeddadasa; aawi bainnaageetakka huqqunnadasa.

¹⁰Ne yuushuwan gitee dooddi uttidoogee hegaassa; akeekennan yashshai nena kokkorssiyoogeekka hegaassa.

¹¹Neeni be7ennaadan, neeyyo xumiyoogee hegaassa; qassi kixa haattai nena muukkiyoogeekka hegaassa.

¹²“Xoossai bolla xoqqa saluwan uttidi, xoqqan de7iya xoolintteta duge xeellees.

¹³SHin neeni, ‘Xoossai ai erii? I hegaa mala, sakkana xumaa giddoorakka pirddanau danddayii?

¹⁴Salo gufanttuwaa bolli i simerettiyo wode, i be7ennaadan, sikkida shaarai a goozees’ yaagaasa.

¹⁵“Nagaranchchati hemettido beni ogiyan baanau qofaa qachchadii?

¹⁶Eti bantta wodee gakkennan de7ishin haiqqidosona; eta de7uwaa baasoikka di7uwan meecetti xayiis.

¹⁷Eti Xoossaa, ‘Nuuppe haakka! Ubbaa Danddayiya Xoossai nuuyyo ai oottanau danddayii?’ yaagidosona.

¹⁸Gidikkonne, eta keettan lo77obaa kunttidaagee Xoossaa. Hegaa gishshau, iita asatu qofai taayyo gelenna.

¹⁹“Iita asatu bolli gakkiyaabaa be7idi, xilloti ufaittoosona; suure asatikka hagaadan yaagidi, eta bolli qilliiccoosona;

²⁰‘Tumaappe nu morkketi xayidosona; eta duretettaakka tamai miis’ yaagoosona.

²¹“Iyyoobaa, ha77ikka Xoossaara giiga; aara saro de7a. Yaatikko, neeni anjjettana.

²²A doonaappe timirttiyaa ekka; a qaalatakka ne wozanan wotta.

²³Nenatettaa ziqqissada, Ubbaa Danddayiya Xoossaakko, neeni simma; iita ooso ubbaa ne sooppe digga.

²⁴Ne worqqaa sa7an ola; ne muruta worqqaakka shaafaa shuchchan ola.

²⁵Ubbaa Danddayiya Xoossai neeyyo worqqanne doorettida bira gido.

²⁶“Hegaappe guyyiyan, neeni Ubbaa Danddayiya Xoossan tumu ufaittana; ufaittada yeellatenna Xoossaakko pude xeellana.

²⁷Neeni Xoossaa woossana; woossin i siyana; qassi neeni ne shiiquwaa ayyo gattana.

²⁸Neeni zorettada qachchidobai neeyyo polettana; ne hemettiyo ogiyankka poo7oi poo7ana.

²⁹Aissi giikko, Xoossai otorettiyaageeta kaushshees; shin banttana ziqqissiyaageeta ashshees.

³⁰I suure asa wotti ekkees. Ne kushee naaquwaappe geeshsha gidikko, i nena ashshana” yaagiis.