JOB 34:18-34

¹⁸Qui dicit regi: Apostata; qui vocat duces impios;

¹⁹qui non accipit personas principum, nec cognovit tyrannum cum disceptaret contra pauperem: opus enim manuum ejus sunt universi.

²⁰Subito morientur, et in media nocte turbabuntur populi: et pertransibunt, et auferent violentum absque manu.

²¹Oculi enim ejus super vias hominum, et omnes gressus eorum considerat.

²²Non sunt tenebræ, et non est umbra mortis, ut abscondantur ibi qui operantur iniquitatem,

²³neque enim ultra in hominis potestate est, ut veniat ad Deum in judicium.

²⁴Conteret multos, et innumerabiles, et stare faciet alios pro eis.

²⁵Novit enim opera eorum, et idcirco inducet noctem, et conterentur.

²⁶Quasi impios percussit eos in loco videntium:

²⁷qui quasi de industria recesserunt ab eo, et omnes vias ejus intelligere noluerunt:

²⁸ut pervenire facerent ad eum clamorem egeni, et audiret vocem pauperum.

²⁹Ipso enim concedente pacem, quis est qui condemnet? ex quo absconderit vultum, quis est qui contempletur eum, et super gentes, et super omnes homines?

³⁰Qui regnare facit hominem hypocritam propter peccata populi.

³¹Quia ergo ego locutus sum ad Deum, te quoque non prohibebo.

³²Si erravi, tu doce me; si iniquitatem locutus sum, ultra non addam.

³³Numquid a te Deus expetit eam, quia displicuit tibi? tu enim cœpisti loqui, et non ego: quod si quid nosti melius, loquere.

³⁴Viri intelligentes loquantur mihi, et vir sapiens audiat me.