Iob 34:18-34

¹⁸I topa ia laka ba da biti tai ta king: U a tutana vakuku, Ba tai ta luluai: U ti kaina muka?

¹⁹God pa i ru ra umana luluai, A umana uviana ma ra umana luveana dia varogop pirana, Tago diat parika a vuai ra papalum na limana.

²⁰Ta ra kopono pitu mata dia mat, ta ra mutumut; Di vadadar ra tarai ma di kari vue diat, Ma ra umana luluai dia papaniai vakaian.

²¹A mata i God i gire ra tutana, Ma i kapa ure kana lavur vinavana.

²²Pa ta bingnimuna, ma pa ta malur bula, Nina ba ra umana tena pait ra kaina diat a parau tana.

²³God pa i ga tibe ra bung ure ta tikai, Upi na tur ta ra varkurai ta ra luaina matana.

²⁴I bubur gigi ra umana ngalangala ba pa i titir ure diat, Ma i vaki ra umana enana ta kadia umana tiniba.

²⁵Tago i kapa ure kadia lavur mangamangana papalum, I vue pukue diat ta ra marum, ma dia kinkin.

²⁶I ubu diat da di ubu ra umana tena varpiam Ta ra mata i ra tarai,

²⁷Tago dia ga lingan irai kan ia, Ma pa dia ga ru kana lavur nga,

²⁸Ma tago ra kinail kai ra umana luveana i ga arikai tadav ia, Ma i ga valongore ra tinangi kadiat di vakadik diat.

²⁹Ba i ki vovovon, to ia na vartakun? Ona i ive ra matana, to ia na gire? Nam i pait ia ure ra tarai ma ure ra vuna gunan bula,

³⁰Upi koko nina i piam vue God na ki na varkurai, Ma upi koko ta tikai na ben varara ra tarai.

³¹Dave, ta tikai i ga biti tai God: Iau tar kairane ra kinadik, ma pa ina varpiam mulai;

³²Una tovo iau ta ra magit iau. tuptup tana; Ma gala iau ga tar pait ta kaina mangamangana, pa ina pait ia mulai?

³³Dave, na bali u da u mainge, tago u ole? Tago ra varpilak i tur piram, ma vakir piragu; Damana una vaarike ra magit u nunure.

³⁴A umana tena minatoto diat a biti tagu, Ma ra tena kabinana nina i valongore kaugu tinata na biti: