Job 34:18-34

¹⁸Got e turguy ni nge gechignag e pilung nge pi tagagiyeg ko ngiyal’ ni dariy farad ngabang ara ba kireb e gafarig rorad.

¹⁹Der ma mang ko pi’in tagagiyeg ma der ma fol ko pi’in fel’ rogon me pag e gafgow, ya ir e sunmiy gubin e girdi’.

²⁰Rayag ni nge yim’ be’ nib tomgin nnep’. Got e ma gad pa’ ko girdi’ ngarm’ad; de mom’aw ngak ni nge thang e fan rok e pi madangdang.

²¹Ma yaliy urngin e gachgach ko girdi’.

²²Dariy ba lumor nrayag ni mithag ba tadenen rok Got.

²³Got e de t’uf rok ni nge duwgiliy e ngiyal’ ni nge yan e girdi’ nge pufthin nagrad.

²⁴De t’uf rok ni nge firtiy murung’agen e pi tayugang’ mfini yin’ luwrad.

²⁵Bochan e manang ko mang e yad ma rin’; be toyrad ni lukngun e nep’.

²⁶Ma gechignag e pi tadenen u p’eowchen e girdi’;

²⁷ni bochan e dakrir folwokgad rok ma kar sabalbalyang nigedyad ko gubin e tin ni yog.

²⁸Yad ma motogal ngak e gafgow ngar yorgad ngalang ngak Got, me rung’ag lungrad ni yad be man ayuw.

²⁹Fa’anra turguy Got ndariy ban’en ni nge rin’, ma dariy be’ nrayag rok ni nge thibthibnag. Ma fa’anra mithag owchen, mra par e girdi’ ni dariy ban’en nrayag rorad.

³⁰Dariy ban’en nrayag ni nge rin’ e pi nam ni nge dabi gagiyeg nagrad e pi’in nde nang Got.

³¹Job, ka mu puwofaynag e pi denen rom ngak Got ma ka mu micheg ni dabkum denen bayay?

³²Kamog ngak Got ni nge dag ngom e kireb rom, ma ke m’ag u wun’um ni ngam tal i ngongliy e kireb?

³³Faanra gabe puwan’ ko tin be rin’ Got, ma ga be leamnag ni ra rin’ e n’en ni ga be finey? Gur e ngam turguy, gathi gag; mog ngomad e chiney e n’en ni gabe leam nag.

³⁴Be’ nib sul lanyan’ ngak e rib muduwgil nra pining e kefel’ ngay; ma re mo’on nib gonop nra rung’ag e thin rog e ra yog