Iyyooba Maxaafaa 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yaagin Iyyoobi zaaridi, hagaadan yaagiis;

²“Hayyanintta, intte tumukka asa; aadhdhida eratetta ubbaikka inttenaara haiqqana!

³SHin taukka intteegaadan akeekai de7ees; taani intteppe laafikke! Ha intte haasayidobaa ubbaa ooninne erees.

⁴Taani Xoossaa woossin, i siyido asa gidikkonne, ta laggetuyyo miicciyoobaa kiyaas; taani xillonne boree bainna asa gidikkokka, qilliicciyoobaa kiyaas.

⁵Inttena aiba metoinne gakkibeenna gishshau, ta metuwaa kareeta; kunddanau ganddigaariya bitaniyaakka sugeeta.

⁶Bonqqiyaageetu keettati saro de7oosona; Xoossaa yiilloyiyaageetikka hirggi bainnan de7oosona. Eta kushiyaa wolqqai eti goinniyo xoossa.

⁷“SHin neeni ane meheta oichcha; eti nena tamaarissana. Woikko saluwaa kafota oichcha; eti neeyyo yootana.

⁸Woikko sa7aara gooshettiya meretati nena tamaarissana; abbaa moletikka neeyyo odana.

⁹GODAA kushee hagaa oottidoogaa hageetu ubbaa giddon erennai oonee?

¹⁰Paxa de7iya meretatu ubbaa de7oinne asa ubbaa shemppoi a kushiyaana.

¹¹Inxxarssai qumaa shaakki eriyoogaadan, haittai haasayaa shaakkidi erenneeyye?

¹²“Aadhdhida eratettai cimida asatu matan de7ees; daro wodiyaa de7iyoogee akeekaa immees.

¹³Xoossaassi aadhdhida eratettainne wolqqai de7ees; zoreenne akeekai an beettees.

¹⁴Xoossai qolidobaa zaaretti keexxanai oonee? I qachchido uraakka birshshi yeddanai oonee?

¹⁵Xoossai iraa teqqikko, biittai melees; i iraa bukissikko, di7oi biittaa bashshees.

¹⁶“Minotettainne xoonoi Xoossaagaa; cimettiyaageenne cimmiyaageenne naa77aikka appe garssaara de7oosona.

¹⁷Zoriyaageetuppe i aadhdhida eraa qaari ekkees; halaqatakka i gooshshees.

¹⁸I kawota kawotaa araataappe wottees; wottidi ailleta kessees.

¹⁹Qeesetuppekka bonchchuwaa qaari ekkees; wolqqaamatakka aatti yeggees.

²⁰Ammanettida asatakka co77u oottees; cimatuppekka akeekaa wotti ekkees.

²¹Halaqata kaushshees; deriyaa kaalettiyaageetu wolqqaakka wurssees.

²²“Xuman de7iya xuura yohota qonccissees; sakkana xuma sohuwaakka poo7o kessees.

²³Xoossai kawotettata gitayees; gitayidi qassi xoonees. Kawotettaakka aassees; aassidi qassi xaissees.

²⁴Sa7aa asaa halaqata akeekaa diggidi, ogee bainna bazzuwan toilattanaadan oottees.

²⁵Poo7oi bainna xuman eti tattaafoosona; mattottida asatudan eti ganddigaaroosona.