Job 34:18-34

¹⁸Manghai te,'hlang muen,' hlangcong te 'Halang,' a ti nah nim?

¹⁹Amah loh mangpa maelhmai dan pawt tih tattloel maelhmai lakah rhoeikhang kah a hmat tloe moenih. Amih boeih te amah kut dongah kutngo ni.

²⁰Mikhaptok ah a duek dongah pilnam khoyin pathung ah tuen tih khum uh. Kut nen pawt akhaw aka lueng a khoe uh.

²¹A mik te hlang kah longpuei dongah a khueh tih a khokan boeih te a hmuh.

²²Boethae aka saii rhoek thuh hamla hmaisuep om pawt tih dueknah hlipkhup khaw a om moenih.

²³Pathen taengkah laitloeknah dongla a pha ham coeng dongah hlang te koep a cae moenih.

²⁴Aka khuet khenah a om pawt ah a phaek tih amih yueng la a tloe a khueh.

²⁵Amih kah khoboe te a hmat dongah khoyin ah a maelh tih pop uh.

²⁶Halang rhoek ham tah hmuh nah hmuen ah amih te kut a paeng thil.

²⁷Te dongah ni a hnuk lamloh nong uh tangloeng tih a longpuei boeih te cangbam uh pawh.

²⁸tattloel kah pangngawlnah te a taengla pawk tih mangdaeng kah pangngawlnah a yaak.

²⁹Tedae amah te mong tih ulong a boe sak. Maelhmai a thuh vaengah ulong anih a mae? Tedae namtom so neh hlang khat soah khaw rhenten om ta.

³⁰Lailak hlang a manghai khaw pilnam ham hlaeh la poeh.

³¹Pathen taengah tah,'Ka laikoi pawt khaw ka phueih.

³²Nang kam hmuh pawt ah kai nan thuinuet coeng. Dumlai ka saii mai cakhaw ka koei voel boel eh,' a ti nama thui coeng.

³³Na hnawt coeng dongah te kah te namah taeng lamloh na thuung aya? Namah loh na coelh coeng, kai long moenih. Te dongah na ming te thui to.

³⁴Thinko aka khueh hlang rhoek loh kai taengah thui uh lamtah hlang cueih loh kai taengkah he hnatun saeh.