ISƆBU 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Kɛ̀ Ediu bɑɑ nsɔkɛ́ o nɑ́ɑǹtì kɛ bɛ́i nkɛ dɔ̀:

²Isɔbu nkpɑɑ́ kémmú kɛ̀ n tì ndɑ wénkùnnɛ, tinɑ́ɑǹtì kpɑɑ́ bomu Kuyie ndɔ́ n dɑ nɑ́kɛ́ tì.

³N yĩ́ɛ̃́tímɛ̀ yóó tuɔkɛ dɛ̀ í tɔ̀kɛ́, n dɔ́ kɛ́duɔ́ nwèè n dɔ̀ɔ̀ wènwe kunɑɑtí.

⁴N nɑ́ɑ́ ntimɔ́mmɔnti nti n yí soú, mɛyĩ́ɛ̃́tímɛ̀ mɔ́mmɔmmɛ yiɛ̀ nweè tùɔ̀kɛní.

⁵Kuyie nkpeńnìmu kù í yetírí òmɔù, kɛ̀ kù bɛ́i ntì tinti.

⁶Kù ɔ̃ɔ̃ í nyóu oyɛiwe kòo nfòù, kuù ɔ̃ nkómmú osénnìwè.

⁷Kù ɔ̃ɔ̃ í ndɛ́tìnnɛ ku nɔ̀nfɛ̀ bɛ̀ɛ̀ wetí bɛ ĩ́nkɛ̀, kuù bɛ̀ kɑ̀nnìnko yɛkpɑ̀ɑ̀tìkɑ̀rɛ̀, kɛ̀ bɛ̀ yɛ̀ kɑ̀rì sɑ̃́ɑ̃̀, kɛ̀ tɛfentɛ̀ nɛ́ bɛ̀ pĩ.

⁸Kɛ̀ bɛ̀ bɛ̀ tɑ̀ú mmɛfĩmmɛ, kɛ̀ bɛ̀ ɑ́ɑ̀rì mɛdiɛ̀.

⁹Kù bɛ̀ bɛnkú bɛ cɑɑ̀rìmɛ̀ mmɛ, nɛ̀ bɛ̀ yetírímɛ̀ ku kpɛti kɛ ɑ̃ɑ̃̀ sifeí.

¹⁰Kù bɛ̀ cɑúmmu kɛ tú bɛ̀ɛ kéntɛ́ ku tié, kɛ bɛ̀ nɑ̀ɑ́ nkɛ tú bɛ̀ɛ yóu mɛyɛi mmudɔɔ̀rìmù.

¹¹Kɛ̀ bɛ̀ kèńtɛ́ kɛ yie nku kpɛti, bɛ̀ɛ deè bɛ we nɛ̀ diwɛ̀ì, kɛ́ntuɔ́ nkɛ́deènɛ̀ bɛ bie.

¹²Kɛ̀ bɛ̀ mɛ nyí yie nkɛ kèńtɛ́ mudoò mùù bɛ̀ doti, kɛ̀ bɛ̀ bo kú bɛ̀ í bɑntɛ́ mɛ̀ɛ̀ kpɛ́í.

¹³Bɛnitiyɛibɛ biɛ miɛkɛ ɔ̃ mpɛ́imu Kuyie, bɛ̀ mɛ nhɔ̃ í nkù kuɔ́nnɛ̀ kù bɛ̀ potɛ́ dìì mɔ̀nnì.

¹⁴Dɛ yɛmbɛ̀ ɔ̃ɔ̃ kú bɛ bɛ́ntì nti, bɛ̀ ɔ̃ ndɔuti dɔutinɛ̀ bɛtɔbɛ̀ mbɛ kɛ́kṹntɛ́ bɛ fòmmu.

¹⁵Kuyie nhɔ̃ɔ̃ yóu kɛ̀ mɛfɛ̃́ṹtímɛ̀ɛ tùɔkɛní ku kɔbɛ kɛ̀ kù bo bɛ̀ duɔ́ nyitié nyi, kù ɔ̃ɔ̃ yóu kɛ̀ bɛ̀ɛ fɛ̃́ṹtɛ́ kɛ bo kù kèńtɛ́mu.

¹⁶Kù dɔ́ kɛ dɑ dennɛ mɛsémmɛ̀ miɛkɛ nkɛ, kɛ dɑ tɑnnɛ́ mɛtuɔ̀ mmiɛkɛ, kɑ̀ɑ nyo ndɛsɑ̀ɑ̀rɛ̀.

¹⁷Kɑ̀ɑ yɛ̀mmɛ̀ mɛ ndònnɛ̀ bɛyɛibɛ kɔ̃mɛ, tibeéntì doti ɑ ĩ́nkɛ̀ nkɛ.

¹⁸Kɛmiɛkɛ bɑ́ɑ́ dɑ soutɛ́ kɑ̀ɑ sɑ̃́ɑ̃́ nKuyie, ticuuti bɑ́ nte kɑ̀ɑ dɑutɛ́.

¹⁹A dɑbònnì diì í yó nte kɑ̀ɑ yɛ̀ mɛsémmɛ̀ miɛkɛ, bɑ́ kɑ̀ɑ dɔ́ ɑ kuɔ́nnɛ̀ ɑ wɛ̃rímú mumɔu.

²⁰A bɑ́ mbɑɑ kɛyènkɛ̀ bo tuɔkɛnímɛ̀ kɛ́cíɛ mbɛnìtìbɛ̀.

²¹A ndɑkɛ kɛ bɑ́ɑ́ yie nkɛ́tũnnɛ mɛyɛi nkó kucɛ, kɛ yɛ̃́ dɛɛ̀ temɛ̀ kɑ̀ɑ tɑ mɛsémmɛ̀ miɛkɛ.

²²Kuyie ndɛumu kɛ kpeńnì, we mbo nɑ kɛ́duɔ́ nyitié nkù duɔ̀ nyì?

²³We nkù bɛnkú kù dò nkɛ́dɔɔ̀mɛ̀? Kɛ bo nɑ kɛ kù nɑ̀kɛ́ kɛ dɔ̀: A yetɛ́mu?

²⁴Bɛnìtìbɛ̀ bɛmɔu ku nsɑ̃ntí ku tɔ̃mmú kpɛ́í, fɔ̃́ mmúnkɛ, ɑ nyɛ̃́ kɛ́ nkù sɑ̃ntí.

²⁵Bɛnìtìbɛ̀ bɛmɔu mù yɑ̀mu, mɛdɛ́timɛ̀ mmɛ bɛ̀ mù wùónnímɛ̀.

²⁶Kuyie ndɛumu kɛ mɛ̀nkɛ dɛu, ku bie nyí dò nkɑɑ nkɛ́deè.

²⁷Kuù ɔ̃ɔ̃ yṹɔ̃́ mmɛniɛ nkɛ́dee nkɛĩ́nkɛ̀, kɛ̀ dɛ̀ɛ dɔɔ̀ yɛwɛtɛ̀ kɛ̀ fɛtɑɑfɛ̀ɛ ni.

²⁸Kɛ̀ yɛwɛtɛ̀ɛ fɛ̀ cṹũnní, kɛ̀ fɛ̀ nniu bɛnìtìbɛ̀ bɛmɔu ĩ́nkɛ̀.

²⁹We mbo nɑ kɛ́bɑntɛ́ yɛwɛtɛ̀ cèntìmɛ̀? We nyɛ̃́ fɛtɑɑfɛ̀ dɑbònnì dòmmɛ̀ tiwɛtì miɛkɛ?

³⁰Kuyie kuù ɔ̃ɔ̃ míítɛ́ kuwenniku tiwɛtì miɛkɛ, kɛ̀ dɑ̀mɛ́ɛ̀rì ndo nsɑ̃̀ṹ.

³¹Kù piú yɛbotɛ̀ nɛ̀ fɛtɑɑfɛ̀ nfɛ, kɛ yɛ̀ duɔ̀ ntidiitì mɛdiɛ̀.

³²Kù pikù fɛtɑpíɛ̀fɛ̀ nfɛ ku nɔ̀ùtɛ̀ miɛkɛ, kɛ fɛ̀ bɔmmù kù fɛ̀ dɔ́nɛ̀ wè.

³³Fɛtɑɑfɛ̀ dɑbònnì diì ɔ̃ɔ̃ bɛnkɛ Kuyie ntɔ̀ɔ́nnímɛ̀, kɛ iwũɔ̃ mɔ́mmɔnyi nyɛ̃́ kù duunnímɛ̀.